Самолёт ва вертолёт ҳавода тўқнашиб кетди. Қурбон бор (видео)

АҚШнинг Пенсильвания штатида Cessna 150 самолёти штат полициясининг Bell 407 вертолёти билан тўқнашиб кетди. Оқибатда самолёт учувчиси ҳалок бўлди. Бу ҳақда “Associated Press” хабар берди.

Ҳодиса кеча, 19 август куни Филадельфиядан қарийб 170 километр шимоли-ғарбида жойлашган Карлайль шаҳридаги кичик аэропорт яқинида содир бўлган. Маълумотларга кўра, Cessna 150 самолёти учиш-қўниш йўлагига қўнаётган вақтда ерга яқин учиб турган полиция вертолётига урилган.

Федерал авиация маъмурияти ва Миллий транспорт хавфсизлиги кенгаши ҳодисани ҳаводаги тўқнашув сифатида баҳолаган. Тўқнашув жуда кучли бўлган. Пенсильвания штати полицияси комиссари вазифасини бажарувчи подполковник Жорж Бивенснинг айтишича, самолёт зарбадан кейин кўплаб бўлакларга парчаланиб кетган.

Вертолётда бўлган икки нафар полиция ходими эса жароҳатланган. Улардан бири ойнадан чиқиб, иккинчи ходимга ҳам вертолётдан чиқишга ёрдам берган. Уларнинг иккаласи ҳам тирик қолган.

Қайд этилишича, вертолёт ҳодиса вақтида машғулот парвозини амалга ошираётган бўлган. Cessna 150 эса одатда ўқув парвозларида фойдаланиладиган икки ўринли самолёт ҳисобланади.

Ҳозирда ҳодиса юзасидан тергов олиб борилмоқда. Мутахассислар тўқнашув қандай содир бўлганини ва самолётнинг ҳавога кўтарилган ёки йўқлигини аниқламоқда.

“Бугунги воқеа оқибати бундан ҳам оғир бўлиши, штат полицияси оиласи учун бу янада фожиали кунга айланиши мумкин эди,” деди губернатор Жош Шапиро.

Эслатиб ўтамиз, аввалроқ АҚШнинг Юта штатида ўрмон ёнғинини ўчириш ишларида қатнашаётган вертолёт ҳалокатга учрагани ҳақида хабар берилган эди.