Самарқандда “опий”ни ички аъзоларига яширган эр-хотин ушланди

Бугун, 14 февраль куни Самарқанд вилоятида қўшни давлатдан келган икки нафар фуқаро 796 грамм “опий” гиёҳвандлик моддасини “Жартепа” чегара божхона постидан ноқонуний олиб кирмоқчи бўлган вақтида ушланди. Бу ҳақда вилоят Божхона бошқармаси хабар берди.  

Маълум қилинишича, божхона ходимлари қўшни давлатдан келган икки нафар фуқарони текширувдан ўтказган. Текширув жараёнида аёл йўловчи махсус “Body skaner” қурилмаси орқали кўрикдан ўтказилганда, унинг ички аъзоларида 3 та ўрам борлиги аниқланган. Шифокорлар иштирокида очиб кўрилган ўрамлардан жами 255 грамм “опий” топилган.

Шунингдек, ушбу фуқарога ҳамроҳлик қилаётган турмуш ўртоғи ҳам тезкор ходимлар томонидан дарҳол кузатувга олинган ва Самарқанд шаҳридаги шифохоналардан бирига олиб келинган. Тиббий кўрик давомида унинг ички аъзоларидан 4 дона ўрамлар чиқариб олинган. Мазкур ўрамларга эса  541 грамм “опий” гиёҳвандлик моддаси жойлангани аниқланади.

Натижада жами 796 грамм опий гиёҳвандлик моддасини ноқонуний олиб киришга уринишнинг олди олинган. Ҳозирда ҳолат юзасидан суриштирув ишлари олиб борилмоқда.

Эслатиб ўтамиз, аввалроқ Тошкентда ширинлик орасига яширилган қорадорини хориждан олиб ўтмоқчи бўлган 19 ёшли қиз ушланганди. У гиёҳвандлик воситаларини наркокурерлар томонидан “закладка” тарзида қолдирилган жойдан олиб, Тошкент шаҳрига кетаётган бўлган.