Самарқандда 55 ёшли аёл эрини ўлдирди

Самарқанд вилоятининг Қўшработ туманида 55 ёшли аёл ичкиликка муккасидан кетган эрини ўлдирганликда айбланиб, 12 йилга қамалди. Бу ҳақда Олий суд матбуот котиби Азиз Обидов хабар берди. 

Маълум бўлишича, эркак доимий равишда ичиб юрган, ҳеч қаерда ишламаган ва рўзғорга умуман аралашмаган. Шу сабабли эр-хотин ўртасида доимий жанжал келиб чиққан. Қотиллик содир бўлган куни аёл уйига қайтганида уйда эрининг танишлари билан зиёфат қилиб ўтирганини кўрган. У танишларини ҳайдаб юбориб, эри билан жанжаллашган. Оқибатда аёл турмуш ўртоғининг кўкраги ва оёғига пичоқ санчган.

Эркак олган жароҳатларидан вафот этган. Аёл эса жиноятини яширишга уриниб, эрининг қон теккан кийимини алмаштириб қўйган ва марҳумнинг табиий ўлим оқибатида вафот этганини айтган. Бироқ ҳуқуқ-тартибот идоралари ходимлари марҳумнинг жасадини кўздан кечирганда зўравонлик изларини топган. Суд-тиббий экспертиза натижалари ҳам аёлнинг табиий ўлими ҳақидаги сўзини рад этган. Шунингдек, аёл олий маълумотли тиббиёт ходими экани маълум бўлган. 

Суд жараёнида прокурор аёлга 13 йил қамоқ жазоси берилишини сўраган. Мазкур ҳолат юзасидан Жиноят ишлари бўйича Қўшработ туман суди аёлни Жиноят кодексининг 97-моддаси (қасддан одам ўлдириш) билан айбдор деб топиб, 12 йилга озодликдан маҳрум қилди.

Эслатиб ўтамиз, аввалроқ Тошкент вилоятида хотинини ўлдиришда гумонланган эркак ушланганди.

Моҳимбегим Маъруфалиева