“Salimboyvachcha” va “Saidaziz medgorodok” qo‘yib yuborildimi?

Ijtimoiy tarmoqlarda Toshkentda qo‘lga olingan Salim Abduvaliyev  (“Salimboyvachcha”) va Saidaziz Saidaliyev (“Saidaziz medgorodok”) qo‘yib yuborilgani to‘g‘risida xabarlar tarqaldi. QALAMPIR.UZ ushbu gaplar ortidan tushdi va ularga qo‘llanilgan qamoq ehtiyot chorasi o‘zgartirilmaganini aniqladi. 

Tahririyatning huquq-tartibot organlaridagi manbasiga ko‘ra, ular qo‘yib yuborilgani haqidagi tarqalgan xabarlar haqiqatga to‘g‘ri kelmaydi.

Ma’lum qilinishicha, Salim Abduvaliyev va Saidaziz Saidaliyevga nisbatan hozirda tergov ishlari davom etmoqda, ularga qo‘llanilgan qamoq ehtiyot chorasi o‘z kuchida qolgan.

Eslatib o‘tamiz, O‘zbekistonda kriminogen vaziyatni yaxshilash, jinoyatchilikka qarshi kurashish borasida davom etayotgan “Dolzarb 40 kunlik” tadbirlari davomida “Saidaziz medgorodok” nomi bilan tanilgan Saidaziz Saidaliyev qo‘lga olingandi. U Jinoyat kodeksining 165-moddasi (“Tovlamachilik”) bilan qo‘zg‘atilgan jinoyat ishi bo‘yicha tergov qilinmoqda.

Shuningdek, O‘zbekiston Milliy Olimpiya qo‘mitasi raisining o‘rinbosari, Sport kurashlari assotsiatsiyasi raisi Salim Abduvaliyev (“Salimboyvachcha”) ham Toshkentning Fayzobod dahasida joylashgan uyidan olib ketilgan.

Toshkent shahar IIBB boshlig‘ining birinchi o‘rinbosari Doniyor Toshxo‘jayevga ko‘ra, Salim Abduvaliyevning noqonuniy qurol saqlayotgani aniqlangan. Unga nisbatan Jinoyat kodeksining 248-moddasi bilan ish qo‘zg‘atilgan va qamoqqa olish ehtiyot chorasi tanlangan. Hozirda dastlabki tergov harakatlari olib borilmoqda.