“Салимбойвачча” озодликка чиқди

Халқ орасида “Салимбойвачча” номи билан машҳур Салим Абдувалиев 12 январь куни озодликка чиқарилди.

Кўпгина ОАВ Абдувалиевнинг қамоқдан чиққани ҳақида хабарлар эълон қилган бўлса ҳам, расмий идоралар бу бўйича лом-мим демади.

QALAMPIR.UZ манбасига кўра, жорий йилнинг май ойида 75 ёшни қаршилайдиган Салим Абдувалиев касаллиги туфайли  Жиноят кодексининг 75-моддаси (Касаллик ёки меҳнат қобилиятини йўқотиш оқибатида жазодан озод қилиш) тартибида жазодан озод қилинган ва озодликка чиқарилган.

Абдувалиевнинг озодликка чиққанига унинг қизи Нилуфар Абдувалиева ҳам Instagram саҳифаси орқали ишора қилди. У 12 январь куни Instagram’ига отасининг суратини жойлади. 

“Салимбойвачча” нега қамалганди?

Салим Абдувалиев 2023 йилнинг 1 декабрь куни ҳуқуқ-тартибот идоралари томонидан Ўзбекистонда криминоген вазиятни яхшилаш, жиноятчиликка қарши курашиш бўйича ноябрь ойида бошланган “Долзарб 40 кунлик” тадбирлари давомида Тошкентнинг Файзобод даҳасида жойлашган уйидан олиб кетилганди.

2024 йил 19 март куни жиноят ишлари бўйича Миробод туман судида Салим Абдувалиевга оид жиноят ишини кўриб чиқиш бўйича суд жараёни якунланиб, ҳукм эълон қилинган.

Суд ҳукмига кўра, Салим Абдувалиев Жиноят кодексининг 246-моддаси (контрабанда) 1-қисми билан жиноий жавобгарликка тортиш муддати ўтиб кетганлиги сабабли жиноий жавобгарликдан озод этилиб, жиноят ишининг шу қисми Жиноят-процессуал кодекснинг 84-моддаси (айблилик тўғрисидаги масалани ҳал қилмай туриб жиноят ишини тугатиш учун асослар) 1-қисми 1-бандига асосан тугатилган.

Салим Абдувалиев Жиноят кодексининг 248-моддаси (ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) 2-қисмида назарда тутилган жиноятни содир қилганликда айбдор деб топилиб, унга 6 йил муддатга озодликдан маҳрум қилиш жазоси тайинланган. Тайинланган жазони умумий тартибли колонияда ўтаттирилиш белгиланган.

Қайд этиш жоиз, Салим Абдувалиев 2017 йилдан Олимпия қўмитаси раисининг ўринбосари сифатида расмий манбаларда кўрсатиб келинган, эътиборлиси у ҳамон МОҚ расмий сайтида спорт курашлари ассоциацияси раҳбари сифатида қайд этилган. Спортдаги фаолияти давомида Абдувалиев 2015 йилда “Дўстлик” ордени, 2021 йилда эса “Хизмат кўрсатган спорт мураббийи” унвони билан тақдирланган.