“Лолазор”даги қурилиш можароси: болалар майдончаси нега бузилди? (фоторепортаж)

Тошкент шаҳрининг Миробод туманидаги “Лолазор” маҳалласида болалар майдончаси ҳудудида қурилиш ишлари бошланиши маҳалла аҳолиси эътирозига сабаб бўлди. Фуқаролар ушбу ҳудудни сақлаб қолиш ва қурилишнинг қонунийлигини текширишни сўраб мутасадди идораларга бир неча бор мурожаат қилган. QALAMPIR.UZ мухбири ушбу ҳудудга бориб вазиятни ўрганди.

Жорий йилнинг 30 июль куни ўтказилган ўрганишлар давомида мазкур ер майдони дастлаб “Маҳалла” хайрия жамоат фонди балансида бўлгани, кейинчалик эса “Al-Latif Hearts Tower” МЧЖга берилгани маълум бўлди. Шундан сўнг ҳудудни реконструкция қилиш ҳамда қўшимча бино ва иншоотлар барпо этиш учун рухсат берувчи ҳужжатлар расмийлаштирилган.

Шу билан бирга, “Лолазор” маҳалла фуқаролар йиғини ҳудудида яшовчи аҳоли мазкур қурилиш лойиҳасига қарши чиққан. Бундан ташқари, инвестор билан “Маҳалла” хайрия жамоат фонди ўртасида тузилган инвестиция шартномаси кейинчалик бекор қилинган.

Шунга қарамасдан, жорий йилнинг июнь ойида фонд балансидаги 172 квадрат метр майдонга эга бино бузиб ташланган. Текширувларда ушбу ҳаракат оқибатида давлат манфаатларига сезиларли миқдорда зарар етказилгани аниқланган.

Ушбу ҳолат 30 июль куни кечқурун Ўзбекистон Республикаси Президенти Администрацияси раҳбари Саида Мирзиёева томонидан жойига чиқиб ўрганилган. У Миробод туманидаги “Лолазор” маҳалласига ташрифи давомида болалар майдончаси бузилгани, кўп йиллик дарахтлар кесиб ташлангани ҳамда ҳудудда олиб борилаётган қурилиш ишлари билан танишди. Орадан бир кун ўтиб, 31 июль куни Саида Мирзиёева мазкур масала юзасидан ўзининг Telegram-каналида муносабат билдирди.

Унинг айтишича, аҳоли фойдаланиши учун ажратилган шаҳар ҳудудлари офис ёки турар жой бинолари қуриш учун эмас, балки ўзининг асл вазифасига хизмат қилиши керак.

“Миробод туманидаги “Лолазор” маҳалласига борганимизда, маҳалла аҳолиси эккан дарахтлар шафқатсизларча кесиб ташланганига гувоҳ бўлдик. Болалар майдончаси ўрнида эса бизнес маркази қуриш режалаштирилган. Қурилишлар туфайли пойтахтдаги умумий ҳовлилар, болалар ўйин ва спорт майдончалари бирин-кетин йўқолиб бормоқда”, дея ёзган Саида Мирзиёева.

Шунингдек, у Бош прокуратурага Тошкент шаҳри бўйлаб шундай объектларни тўлиқ инвентаризациядан ўтказиш топширилганини маълум қилган.

QALAMPIR.UZ мухбири “Лолазор” маҳалласида яшовчи фуқаро билан суҳбатлашди. Аҳоли вакили ушбу ҳудудда қурилиш бошланишидан олдинги ҳолат, юзага келган эътирозлар ва улар мурожаат қилишга сабаб бўлган омиллар ҳақида сўзлаб берди.

Маҳалла аҳолиси вакилларининг айтишича, қурилиш бошланишидан аввал ушбу ҳудудда болалар майдончаси, яшил ҳудуд ва маҳалла аҳли томонидан йиллар давомида парвариш қилинган дарахтлар мавжуд бўлган. Уларнинг таъкидлашича, ушбу жой оддий бўш ер эмас, балки кўп қаватли уйлар аҳолиси, айниқса болалар фойдаланиб келган умумий ҳудуд ҳисобланган.

Фуқаролар қурилиш бошланишидан аввал ҳудуд атрофи ўралганини, дастлаб эса бу ерда қандай ишлар олиб борилаётгани ҳақида аниқ маълумот берилмаганини билдирди. Уларнинг сўзларига кўра, айримлар эски бино таъмирланади ёки ҳудуд ободонлаштирилади, деб ўйлаган. Бироқ кейинчалик болалар майдончаси олиб ташлангани, дарахтлар кесилгани ва янги бино қурилиши режалаштирилгани маълум бўлган.

Аҳоли вакиллари ҳудуддаги дарахтлар ҳам кўп йиллик эканини таъкидламоқда. Уларнинг айтишича, бу дарахтлар маҳалла аҳолиси томонидан ўнлаб йиллар аввал экилган ва шу ҳудуднинг ажралмас қисми бўлиб келган.

“Лолазор” аҳолиси, шунингдек, қурилиш сабаб ҳудуднинг очиқ майдони қисқариб, маҳалла ичидаги шароит ёмонлашаётганини билдирди. Уларнинг фикрича, бу жойда бино қурилиши нафақат болалар майдончасининг йўқолишига, балки ҳудуддаги яшил майдонларнинг камайишига ҳам олиб келади.

Суҳбат давомида фуқаролар мазкур ҳудуд маҳалладаги сўнгги болалар майдончаларидан бири бўлганини қайд этди. Уларнинг айтишича, яқин атрофдаги бошқа очиқ ҳудудлар ҳам вақт ўтиши билан турли объектларга айлантирилгани сабабли, ушбу майдон болалар учун қолган кам сонли жойлардан бири бўлган.

Маҳалла аҳолиси қурилиш бўйича ўтказилган йиғилишлар масаласига ҳам тўхталди. Уларнинг айтишича, кўп сонли аҳоли яшайдиган ҳудуд бўлишига қарамай, қурилиш масаласида барча фуқароларнинг фикри олинмаган. Аҳоли вакиллари айрим йиғилишларда иштирок этган фуқаролар розилиги бутун маҳалла позицияси сифатида кўрсатилганини таъкидламоқда.

Фуқаролар, шунингдек, уларга дастлаб қурилиш ҳақида бошқа маълумот берилганини, кейинчалик эса анча каттароқ объект қурилиши режалаштирилганини кўрганини айтди. Уларнинг фикрича, режалаштирилаётган бино маҳалладаги мавжуд уйлар архитектураси ва ҳудуднинг умумий кўринишига мос келмаган.

Аҳоли вакиллари яна бир муҳим масалага – қурилиш ҳудуди ўралгани сабаб фавқулодда хизматларнинг кириб келиши қийинлашгани ҳақидаги хавотирларини билдирди. Уларнинг айтишича, тез ёрдам ва ёнғин хавфсизлиги хизматлари учун йўлаклар очиқ бўлиши керак.

Фуқаролар ушбу масала бўйича турли идораларга мурожаат қилганини, шунингдек, Президент Администрациясига ҳам ариза йўллаганини маълум қилди. Уларнинг сўзларига кўра, айнан мурожаатлардан кейин ҳудуддаги вазиятга эътибор кучайган.

Хусусан, мазкур ҳолат юзасидан 27 июль куни Миробод туман прокуратураси томонидан “Al-Latif Hearts Tower” МЧЖ мансабдор шахслари ҳамда бошқа шахсларга нисбатан Жиноят кодексининг тегишли моддалари билан жиноят иши қўзғатилган. Тергов доирасида жамиятнинг норасмий раҳбари сифатида тилга олинаётган Аслиддин Икромов гумон қилинувчи сифатида процессуал тартибда ушланган.

Текширув давомида қурилиш учун берилган рухсатномаларнинг қонунийлиги, шаҳарсозлик меъёрларига риоя этилгани ҳамда аҳоли манфаатлари қай даражада инобатга олингани ўрганилади. Агар қонунбузарлик ҳолатлари аниқланса, айбдорларга нисбатан қатъий чоралар кўрилиши, зарур ҳолларда улар жиноий жавобгарликка тортилиши қайд этилди.

Айни пайтда жиноят иши бўйича тергов ҳаракатлари давом этмоқда. Ваколатли органлар томонидан масъул шахсларнинг ҳаракатларига ҳуқуқий баҳо бериш, шунингдек, болалар майдончаси ва унга туташ ҳудудни аввалги ҳолатига қайтариш бўйича зарур чоралар кўрилаётгани билдирилди.