Россиянинг урушдаги тасдиқланган йўқотишлари 150 мингдан ошди

Украинага қарши тўлиқ миқёсли босқин бошланганидан бери Россия армиясининг тасдиқланган йўқотишлари 152 142 нафарга етди. Бу рақамлар очиқ манбаларни мунтазам кузатиш асосида BBC’нинг Рус хизмати ва “Медиазона” томонидан келтирилган.

Энг кўп ҳалок бўлганлар Бошқирдистон (7643 киши), Татаристон (6599) ва Свердловск вилояти (5386) ҳиссасига тўғри келади. Таққослаш учун: аҳолиси 13 миллиондан ортиқ бўлган Москвадан 4520 ҳарбий ҳалок бўлган, Чеченистондан эса 372 киши. Статистикага фақат Россия фуқаролари киритилган. ДНР ва ЛНР аҳолиси орасидаги йўқотишлар ҳисобга олинмаган.

Ҳалок бўлганларнинг катта қисми – 67 фоизи қишлоқлар, овуллар ва аҳолиси 100 мингдан кам бўлган кичик шаҳарлардан бўлган. Ҳолбуки 2021 йилги аҳолини рўйхатга олиш маълумотларига кўра, мамлакат аҳолисининг ярмидан камроғи ана шундай жойларда яшайди. Демограф Алексей Ракша буни иқтисодий омиллар билан изоҳлайди. Унинг фикрича, депрессив ҳудудларда ҳарбий хизмат барқарор даромаднинг кам сонли манбаларидан бири сифатида кўрилади.

Чикаго университети иқтисодчиси Алексей Захаровнинг қайд этишича, йўқотишлар даражасини белгилайдиган асосий омил – маҳаллий бюджетларнинг федерал субсидияларга қанчалик қарамлиги.

“Қайси бир муниципалитет иқтисодида давлат сектори улуши катта бўлса, у ердан урушга жўнатилган ва ҳалок бўлганлар сони ҳам шунча кўп бўлади”, дейди у.

Жорий йилнинг июнь ойи ўрталарида Британия разведкаси Россиянинг умумий йўқотишларини (ҳалок бўлганлар ва яраланганлар) қарийб бир миллион деб баҳолаган. Шундан 250 минг киши ҳалок бўлган бўлиши мумкин. Лондоннинг баҳосига кўра, “қайтмас” йўқотишлар (ҳалок бўлганлар, бедарак йўқолганлар ва сафга қайтолмайдиган даражада оғир яраланганлар) 400-500 минг киши оралиғида.

АҚШ Давлат котиби Марко Рубио ҳам 2025 йилда йўқотишларнинг кескин ошгани ҳақида айтган. Унинг сўзларига кўра, жорий йилнинг дастлабки олти ойида Россиядан тахминан 100 минг киши ҳалок бўлган. АҚШ Президенти Дональд Трамп эса август ойида аниқлик киритиб, ўз маълумотларига кўра, 2025 йил бошидан бери Россия 112 мингдан ортиқ аскарини йўқотганини, Украинадан эса тахминан 8 минг аскар ҳалок бўлганини билдирган.

“The Economist” ўз таҳлилида фақат 2025 йилнинг 1 майидан 9 июлигача Россия 31 мингга яқин кишини йўқотган бўлиши мумкинлигини, уруш бошидан бери мамлакатнинг жами йўқотишлари 900 мингдан 1,3 миллионгача етишини, шулардан 190-350 минг нафари “қайтмас” йўқотишлар эканини қайд этади. Вашингтондаги Стратегик ва халқаро тадқиқотлар маркази (CSIS) ҳам шунга яқин ҳисоб-китобларни келтирган. Уларнинг баҳосига кўра, Россиянинг йўқотишлари қарийб бир миллион киши бўлиб, шундан 250 минги ҳалок бўлган, яна 400 мингга яқин аскар оғир яраланиб, ногиронга айланган.