Rossiyaning neft zavodlari yana Ukraina dronlari nishoniga aylandi

Bugun, 14 iyulga o‘tar kechasi Ukraina harbiylari Rossiyaning Boshqirdiston Respublikasi va Krasnodar o‘lkasidagi neftni qayta ishlash zavodlariga dronlar bilan hujum qildi. Bu haqda “Meduza” xabar berdi.

Qayd etilishicha, Boshqirdistonning Salavat shahrida Rossiyaning eng yirik neftni qayta ishlash va neft-kimyo majmualaridan biri – “Gazprom neftexim Salavat” hujum ostida qolgan.

Shuningdek, dastlabki ma’lumotlarga ko‘ra, Salavat shahridagi “Rosneft-Opt” neft bazasida ham yong‘in chiqqan.

Boshqirdiston rahbari Radiy Xabirov respublikaga dronlar hujumi uyushtirilganini tasdiqlagan.

“Bir nechta tutun o‘choqlari mavjud va hodisa oqibatida odamlar jabrlanmagan”, deb yozgan u Telegram-kanalida.

Krasnodar o‘lkasida esa dronlar hujumi oqibatida Afipskiy neftni qayta ishlash zavodi hududida yong‘in chiqqan. Dastlab mahalliy aholi rezervuarlar yaqinida olov ko‘ringani haqida xabar bergan, keyinchalik Kuban operativ shtabi korxonada dron hujumi oqibatida yong‘in sodir bo‘lganini tasdiqlagan.

Mintaqaviy tezkor shtab ma’lumotlariga ko‘ra, Afipskiy posyolkasi, Smolenskaya stanitsasi va Kovalenko xutoridagi 16 ta manzilga dron bo‘laklari qulagan. Oqibatda bir nechta turar joy binolarining tomlari va fasadlari shikastlangan, bir kishi jarohat olgan.

Eslatib o‘tamiz, Ukrainaning kecha, 13 iyulga o‘tar kechasi amalga oshirgan dron hujumlari oqibatida Rossiyaning bir necha hududida kamida 4 kishi halok bo‘lib, yana 5 kishi jarohatlangan edi. Shuningdek, Ukraina Rossiyaning “soya floti”ga tegishli 15 ta kemaga ham zarba bergan.