Rossiyaning g‘alabasi Si kabi diktatorlarga signal bo‘ladi – Berbok

Germaniya Tashqi ishlar vaziri Annalena Berbok Xitoy rahbari Szinpinni "diktator" deb atadi. Bu haqda u “Fox News” telekanaliga bergan intervyusida aytib o‘tdi.

Undan Ukraina inqirozining natijasi haqida so‘ralganida, Berbok G‘arb davlatlari Kiyev hukumatini qancha kerak bo‘lsa, shuncha qo‘llab-quvvatlashini aytgan. 

“Agar Rossiya g‘alaba qozonsa, bu Si [Szinpin] kabi diktatorlarga signal beradi”, degan Germaniya TIV rahbari.

Siyosatchi Tayvanni o‘z tarkibiga qo‘shib olishga urinayotgan Xitoy rahbariga ishora qilgan bo‘lsa-da, bu haqda ochiq gapirmagan.

Bundan tashqari, Berbok Amerika Qo‘shma Shtatlarida Vashington tomonidan Ukrainaga ajratilgan mablag‘lar hisobiga iste’mol narxlari ko‘tarilayotganini bildirgan.

“G‘arb davlatlari Kiyevni qo‘llab-quvvatlamasa, bu yanada qimmatroqqa tushishi mumkin", degan Tashqi ishlar vaziri.

Eslatib o‘tamiz, joriy yilning aprel oyida Annalena Berbok Xitoyga borgan va o‘sha paytdagi Xitoy Tashqi ishlar vaziri Sin Gang bilan muzokara o‘tkazgandi.