Россиянинг душманлари мамлакатдаги турли миллатлар орасини бузмоқчи – Қодиров 

"Крокус Сити Ҳолл"даги теракт фонида Россия душманлари миллий масаладан фойдаланиб, мамлакат ичидаги вазиятни бузишга ҳаракат қилмоқда. Бу ҳақда Чеченистон раҳбари Рамзан Қодиров ўзининг Telegram-каналида маълум қилди.

Унинг сўзларига кўра, Россия Федерацияси ҳар доим кўп миллатли бўлган ва шундай бўлиб қолади – бу мамлакатнинг кучи ва қудрати. Россиянинг душманлари айнан мамлакатнинг мана шу фазилатига зарба беришга интиляпти.

Қодиров ҳар қандай ҳолатда ҳам миллий ва диний сабабларга кўра, фуқаровий таъқибга йўл қўйилмаслигини, ҳуқуқ-тартибот идоралари эса бу тамойилга ҳушёрлик билан амал қилишини айтган.

“Аммо давлат миллий сиёсати ва миллий хавфсизликдан узоқда бўлган сохта ватанпарварлар одамларнинг ҳис-туйғулари билан ўйнашиб, фашистик усулларни қўллашга даъват қиляпти”, дея қўшимча қилган у.

Чеченистон раҳбарининг таъкидича, Россия Федерацияси аллақачон неонацизмга қарши муваффақиятли курашмоқда ва унинг мамлакат ичидаги кўринишларига йўл қўйилмайди.