Россияга босим 8-10 кун ичида кучаяди – Макрон

Яқин 8-10 кун ичида Франция ҳукумати Россияга босимни имкон даражада кучайтиради. Бу ҳақда кеча, 28 апрель куни Франция Президенти Эммануэль Макрон “Paris Match” нашрига берган интервьюсида сўз очди.

Президентга кўра, Россия ва Украина ўртасида тинчлик шартномаси имзоланиши, ҳар иккала томон учун ҳам фойдали бўлади.

Бундан ташқари, Франция етакчиси Россияга босим тез орада, 8-10 кун ичида кучайтирилишини таъкидлаган. Аммо “тарозининг бир қисми” Москва билан боғлиқ бўлгани учун эҳтиёткорликни сақлаб қолиш кераклигини ҳам айтиб ўтган.

Франция раҳбари ўз интервьюси давомида америкаликларни ишонтирганини ҳам қўшимча қилган. У Россияга нисбатан таҳдидлар ва санкцияларнинг кучайишига умид қилмоқда. Макрон бу ҳаракатларнинг барчаси Россияни сулҳ столига ўтказиш учун қилинаётганини айтган.

Эслатиб ўтамиз, жорий йилнинг 17 апрель куни Парижда АҚШ, Украина, Буюк Британия, Германия ва Франция вакиллари билан бўлган учрашувда Россия назорати остида қолган ҳудудларни тан олиш эвазига ўт очишни тўхтатиш таклиф қилинган эди. Йиғилишда Россия ҳозир назорат қилаётган ҳудудлар Кремлнинг ўзида қолиши, Украинани НАТОга қабул қилиш масаласини кун тартибидан олиб ташлаш, Ғарб Россияга қўйилган санкцияларни босқичма-босқич олиб ташлаши ва музлатилган активларни қисман қайтариши, шунингдек, “тинчликпарвар кучлар” фақат БМТ шаъфелигида бўлиши мумкинлиги, ҳар икки томон ўзаро даъволардан, жумладан репарациялардан воз кечишиб Украина чегарага 50 км дан яқин жойда йирик ҳарбий кучлар жойлаштира олмаслиги каби таклифлар ҳам муҳокама қилинган.