Россиядан ноқонуний киритилган контрафакт дориларни сақлаган оила аниқланди

Тошкент шаҳрида яшовчи оила хонадонида Россиядан ноқонуний олиб келинган, қиймати қарийб 600 миллион сўмлик контрафакт дори воситаларини сақлаб келаётгани аниқланди. Бу ҳақда Давлат хавфсизлик хизмати хабар берди.

Қайд этилишича, DХХ ва Божхона қўмитаси ҳамкорлигида ўтказилган тезкор тадбирда контрафакт дори воситалари савдосига чек қўйилган. Хусусан, пойтахтнинг Янгиҳаёт туманида яшовчи 1963 йилда туғилган фуқаро ҳамда унинг икки нафар фарзанди томонидан дори воситалари сақлаб келинаётган Тошкент шаҳри ва Тошкент вилоятида жойлашган 3 та хонадон кўздан кечирилган. Натижада, ушбу манзилларда Бусерелин, Волини, Бикана, Тирзетта ва бошқа шу каби жами 29 турдаги 1330 қути контрафакт дори воситалари борлиги аниқланиб, ҳолат процессуал тартибда расмийлаштирилган. 

Дастлабки ҳисоб-китобларга кўра, ушбу маҳсулотларнинг тахминий суммаси 600 миллион сўмни ташкил этади. Маълум бўлишича, мазкур оила аъзолари дори воситаларини Россия Федерациясидан йўловчилар кўмагида кичик партияларда темир йўл ва ҳаво транспорти орқали олиб келиб, Тошкент шаҳрида сотиш билан шуғулланган. 

Билдирилишича, ҳозирда аниқланган дори воситаларига нисбатан экспертиза текширувлари тайинланиб, суриштирув ишлари олиб борилмоқда.

Эслатиб ўтамиз, аввалроқ Наманган шаҳрида яшовчи фуқаро яширин омборхонасида 1,4 миллиард сўмлик ноқонуний дори воситаларини сақлагани аниқланган эди.