Россияда яна икки давлат футбол чемпионатлари намойиши тўхтатилди

Россиянинг Украина сарҳадларига бостириб кириши ортидан, жаҳоннинг йирик иқтисодий кучга эга давлатлари Россия Федерациясига нисбатан янгидан-янги санкциялар пакетини имзоламоқда. Шунингдек, йирик спорт ташкилотлари ҳам рус спортига нисбатан чекловлар жорий қилди.

Футбол бўйича дунёнинг энг томошабоп миллий чемпионатлари ҳам Россия телеканаллари билан имзолагнан шартномаларини бекор қилмоқда. Кеча, 11 март куни Португалия ва Шотландия футбол лигалари трансляцияси россиялик ишқибозлар учун тўхтатилгани маълум қилинди. 

Матч ТВ телеканали бош продюсери Александр Ташиннинг айтишича, Португалия ва Шотландия футбол лигалари учрашувлари трансляцияси бўйича мавжуд шартномалар тўхтатилгани ҳақида Матч ТВ телеканалига хабар беришган.

Аввалроқ, Россия ҳудудида Англия Премьер лигаси баҳслари намойиш қилиниши тўхтатилгани ҳақида хабар берган эдик. Шунингдек, жорий йилнинг март ойи бошидан бери Франция футбол биринчилиги Россияда намойиш қилинмаяпти.

Россия спортига киритилган чекловлар 

Рус қўшинлари Украинага киргач, Халқаро дзюдо федерацияси (ХДФ) Россия Президенти Владимир Путинни ташкилот фахрий президенти ва элчиси мақомидан маҳрум қилди. 

Польша, Чехия ва Швеция футбол терма жамоаси Жаҳон чемпионатига саралаш доирасида Россия билан ўйинга боришдан бош тортди.

Европа футбол уюшмалари иттифоқи (UEFA) 2022 йилги Европа Чемпионлар лигаси финали Санкт-Петербург шаҳридан Парижга кўчирилганини маълум қилди.

FIFA  ҳамда UEFA Россия терма жамоалари ва клубларини барча футбол мусобақаларидан чиқариб ташлади.

Халқаро баскетбол федерацияси россиялик баскетболчилар ва расмий шахсларни ташкилот шафелигидаги барча мусобақаларда иштирок этишдан четлаштирди.

Дунёдаги энг йирик спорт кийимлари компанияси “Аdidas” Россия футбол жамоалари билан ҳамкорликни тўхтатганини маълум қилди. Шунингдек, Германиянинг "Шальке 04" клуби ва UEFA'нинг ўзи ҳам Россиянинг "Газпром" трансмиллий компанияси билан ҳамкорликни тўхтатди.

Халқаро Паралимпия қўмитаси (IPC) россиялик ва беларуслик атлетларни Пекин-2022 Паралимпия ўйинларидан четлатди.

Маъруф Абдумаликов