Россияда темир йўл портлатилди (видео)
Олам
−
01 Май 2023
25457Россиянинг Брянск вилоятининг Унеча туманидан ўтган темир йўл портлатилиши оқибатида юк поезди издан чиқиб кетди. Бу ҳақда “Медуза” хабар берди.
Маълум қилинишича, маҳаллий Telegram-каналларда воқеа жойидан олинган тасвирлар тарқалмоқда. Унда Брянск-Унеча участкасининг 136-километрида портлаш содир бўлгани айтилади. Вилоят губернатори Александр Богомазнинг айтишича, юк поездининг локомотиви рельсдан чиқиб кетган. Ҳодиса оқибатида ҳеч ким жароҳат олмагани, йўлнинг шу қисмида ҳаракат вақтинчалик тўхтатилгани маълум қилинган.
Баъзи манбаларда айтилишича, поезднинг нафақат локомотиви, балки нефть маҳсулотлари ва ёғоч ташийдиган юк вагонларидан етти-саккизтаси ҳам издан чиқиб кетган. Ҳалокатдан сўнг ёнғин содир бўлган.
Украина уруши бошланганидан сўнг Россия махсус хизматлари темир йўлларда диверсия тайёрлашда гумон қилинганларнинг ҳибсга олиниши ҳақида бир неча марта маълумот берган. Ҳисоботларга кўра, Россияда темир йўллардаги саботаж ишлари бўйича 65 дан ортиқ одам ушланган. Уларнинг учдан бир қисмини вояга етмаганлар ташкил этган.
Маълумот учун, Брянск вилоятининг Украина билан 471 километрлик умумий чегараси мавжуд.
LiveБарчаси