Россияда пичоқланиб, бошига қоп кийдирилган ўзбекистонлик ўрмондан топилди

Россиянинг Санкт-Петербург шаҳри яқинидаги Лисий Нос ўрмонида Ўзбекистон фуқароси пичоқ жароҳатлари ва бошига қоп кийдирилган ҳолда топилди. Бу ҳақда “78.ru” хабар берди.

Жабрланувчининг Приморский туман полицияси ходимларига айтишича, у Сестрорецк шаҳрида номаълум шахслар томонидан ўғирлаб кетилган.

Нашр манбасига кўра, эркак ишдан сўнг дўконга кирган. Шу пайтда номаълум шахслар унинг бошига қоп кийдириб, олиб қочиб кетган. Бироз вақт ўтгач, у қариндошларига қўнғироқ қилиб, ҳужум қилганлар ундан 55 минг рубль талаб қилаётганини айтган. Кейинроқ уни ўрмонзор ҳудудига олиб бориб, бир неча марта пичоқлаб, ташлаб кетишган.

Ички ишлар вазирлигининг маълум қилишича, ҳозирда жабрланувчи шифохонада даволанмоқда.

Эслатиб ўтамиз, аввалроқ Москва вилоятининг Шёлково шаҳрида Ўзбекистон фуқароси 49 ёшли кар-соқов эркакни калтаклаб ўлдирганди. Жабрланувчи ахлат контейнерлари ёнидан ўтаётганида, у ерда маҳаллий бошқарув компаниясида ишловчи икки ўзбекистонлик ишчи чиқиндиларни ковлаётган бўлган. Кар-соқов эркак имо-ишоралар орқали норозилигини билдирган – тахмин қилинишича, у уларнинг ахлатни титкилаётганига эътироз билдирган.