Россияда мигрантлар учун карантин жорий этиш таклиф қилинди

Россияга юқумли касалликлар тарқалган мамлакатлардан келаётган мигрантлар учун карантин жорий қилиш таклиф этилди. Бу таклифни “Справедливая Россия — За правду” партияси етакчиси Сергей Миронов илгари сурди.

Мироновнинг таъкидлашича, мамлакатдаги юқумли касалликлар, айниқса, менингит сонининг кўпайиши фақат эмлаш даражасининг пасайиши билан эмас, балки мигрантлар оқими билан ҳам боғлиқ.

“Улар мамлакатга кириб бўлгандан кейин уларни тутиб қолиш фойдасиз. Энг самарали чоралар – ҳозирданоқ менингит ва бошқа хавфли касалликлар авж олган мамлакатлардан келаётганларга карантин жорий қилиш”, деган Миронов. 

Шунингдек, у чет эллик фуқароларга меҳнат визаси фақат эмланган ва соғлиғи тўғрисида тегишли маълумотномага эга бўлган тақдирда берилиши кераклигини таъкидлаган. 

2025 йил бошидан бери Россияда 1 200 та менингит ҳолати қайд этилган, бу эса 2024 йил давомида кузатилган ҳолатларга нисбатан икки баробар кўпдир. Маълумотларга кўра, касаллик асосан қиш-баҳор мавсумида кўп учрайди ва ҳозирда Россияда эпидемиологик вазият барқарор.

Маълумот учун, менингит – бу мия ва орқа мия пардаларининг яллиғланишидир. Касаллик вируслар, бактериялар ёки замбуруғлар орқали юзага келади. Энг хавфли тури бактериал менингитдир, у айниқса менингококк инфекцияси билан боғлиқ бўлиб, даволанмаса ўлимга олиб келиши мумкин. 

Эслатиб ўтамиз, аввалроқ Россия Давлат Думасининг Меҳнат қўмитаси раиси Ярослав Нилов Россияда ишлаш учун келаётган хорижликларга нисбатан қўшимча тиббий талабларни жорий этиш бўйича қонун лойиҳаси ишлаб чиқилаётгани ҳақида айтганди. Таклифга кўра, ҳозирда амал қилаётган тиббий суғуртага қўшимча равишда, мигрантлар наркотик ва психотроп моддалар мавжуд эмаслигини тасдиқловчи тест натижаларини, ОИВ (ВИЧ), Б ва С гепатити, сил (туберкулёз) ҳамда сифилиз йўқлиги ҳақида янгиланган тиббий маълумотномани тақдим этишлари лозим бўлади.