Россияда маймунчечак аниқланди

Россиянинг Москва вилоятида истиқомат қилувчи шахсда маймунчечак касаллиги аниқланиб, у Домодедово шифохонасига ётқизилди. Бу ҳақда кеча, 1 февраль куни ушбу Тиббиёт муассасаси матбуот хизмати хабар берди. 

Қайд этилишича, беморнинг аҳволи қониқарли, у билан симптоматик даволаш олиб борилмоқда. Роспотребнадзор юқтириш манбаи ва бемор билан алоқада бўлган шахсларни аниқлаш мақсадида эпидемиологик текширув ўтказмоқда.

Бемор кеча, 1 февраль куни тана ҳарорати 40 даражагача кўтарилгач, шифохонага олиб борилган. Унгача у шамолладим, деб ўйлаб, уй шароитида даволанган. Касалланган шахс чет элга чиқмаганини ва жамоат ҳаммомларига бормаганини айтмоқда. Унга кўра, юқтириш манбаи номаълум.

Маълумот учун, маймунчечак – иситма, лимфа тугунларининг катталашиши ва терида тошмалар билан кечадиган вирусли касалликдир. У зарарланган ҳайвон ёки инсон билан яқин алоқада бўлиш, биологик суюқликлар ёки ифлосланган буюмлар орқали юқади.

Касаллик асосан Марказий ва Ғарбий Африканинг чекка ҳудудларида кенг тарқалган. Маймунчечакнинг сўнгги йирик авж олиши 2024 йилда Конго Демократик Республикасида бошланган бўлиб, оқибатда 80 мингдан ортиқ киши касалланган, 1,3 минг нафари вафот этган. Инфекция тарқалишига қарши кураш доирасида минтақада фавқулодда ҳолат режими жорий этилган ва у 2026 йил январь ойи охирида бекор қилинган.

Эслатиб ўтамиз, аввалроқ Ҳиндистонда Нипаҳ номли хавфли вирус аниқлангани ҳақида хабар берилган эди.