Россияда хорижликлар интернетсиз ва SMSсиз қолди

Россияда бўлган хорижликлар мобил интернетсиз ва кўплаб онлайн-сервислардан фойдаланиш имконисиз қолмоқда, чунки уларнинг SIM-карталарига тасдиқловчи кодли SMS-хабарлар келмаяпти. Бу ҳақда Россия матбуоти хабар берди.

Россияда хорижий SIM-карталарга ҳатто “совиш даври” тугаганидан сўнг ҳам SMS-хабарлар келмаяпти. “Совиш даври” рус тармоғига биринчи бор уланган пайтдан бошлаб 24 соатлик чеклов бўлиб, унинг блокировкаси 2025 йил октябрь ойи бошида амалга киритилган.

Фойдаланувчиларнинг таъкидлашича, бу ҳолат SIM-картанинг қайси давлатга тегишли эканлигига қарамасдан, барча хорижий рақамларга таaлуқли.

2025 йил август oйида Рақамли ривожланиш вазири Максут Шадаев бундай чорани дронларда ўрнатилган SIM-карталарга қарши курашиш зарурати билан изоҳланган.

Мобил алоқа ва SMS’нинг йўқлиги жиддий ноқулайликларга сабаб бўлмоқда. Фойдаланувчилар, масалан, ўз банкларидан SMS келмагани сабабли хорижий сервислар учун тўлов қила олмаётганини айтмоқда.

“Биз кузатяпмизки, чет элликлар мобил тармоқлардан тобора камроқ фойдаланмоқда. Туристлар роуминг қимматлиги ва оммавий Wi-Fi нуқталари кенг тарқалгани сабабли Wi-Fi орқали уланишни афзал кўришади”, деди “ТМТ Консалтинг” бошқарувчи ҳамкори Константин Анкилов.

Бироқ чет элликлар учун Россияда Wi-Fi тармоқларига уланиш ҳам осон бўлмайди. Қонунчилик талабларига кўра, Wi-Fi’дан фойдаланиш учун SMS-идентификациядан ўтиш лозим. 2025 йил бошидан чет эл фуқароси Россия SIM-картасини сотиб олиши учун яна бир чеклов жорий этилган – телефон қурилмасининг IMEI рақамини рўйхатдан ўтказиш ва ЕПГУ (Ягона давлат ва муниципал хизматлари портали) орқали биометрик маълумот топшириш керак. Бунинг ўзига эса чет эллик аввал ЕПГУда рўйхатдан ўтиши, СНИЛС олиши ва банкда ҳисоб очиши зарур. Натижада чет эл туристларининг Россия Алока операторларига уланиш ҳажми деярли нолга тушди.

Шу муносабат билан алоқа операторлари Рақамли ривожланиш вазирлигидан чет эллик туристлар учун SIM-карта сотиб олиш тартибини соддалаштиришни ва биометрик маълумот топшириш талабини бекор қилишни сўради, зеро чет элликлар мамлакатга киришда барибир бармоқ излари ва юз суратини топширади. Бу ҳолда “туристик” SIM-карталарни маълум муддатдан сўнг деактив қилиш мумкин.