Россияда қирғизистонлик эркак “коммент” учун 3 йилга қамалди

Кеча, 19 февраль куни Москванинг Иккинчи Ғарбий округ ҳарбий суди 30 ёшли Қирғизистон фуқаросини ижтимоий тармоқдаги изоҳи учун озодликдан маҳрум қилиш жазосига ҳукм қилди. Бу ҳақда ТАСС хабар берди.

Қайд этилишича, судланувчи Бекзод Абдуносир ўғли бўлган. У қўлга олиниши олдидан “Атриум” МЧЖда паст кучланишли тизимлар монтажчиси бўлиб ишлаган.

Маълумки, 2024 йил 22 март куни “Крокус Сити Ҳолл”да теракт содир бўлиб, қуролланган эркаклар концерт залига бостириб кириб, одамларга қарата ўт очган, бинога ўт қўйган ва қочиб кетганди. Оқибатда 145 киши ҳалок бўлиб, 550 дан ортиқ одам жароҳатланганди.

Айбловга кўра, апрель ойи бошида қирғизистонлик фуқаро Telegram’даги “Migranti.ru” каналида теракт иштирокчиларининг дастлабки сўроқлари видеоси остида “Қасоскорлик учун катта журъат керак, афсуски улар қўлга тушиб қолди” мазмунидаги изоҳ қолдирган.

Шундан сўнг у 2024 йил 8 ноябрь куни ушланиб, қамоққа олинган.

Суд Бекзод Абдуносир ўғлини Россия Жиноят кодексининг “террорчилик фаолиятига омма олдида даъват қилиш, шу жумладан интернет орқали” моддаси бўйича айбдор деб топган ва унга уч йил умумий тартибдаги колонияда озодликдан маҳрум қилиш жазосини тайинлаган. Шунингдек, у Россиянинг экстремистлар ва террорчилар рўйхатига киритилган.

Эслатиб ўтамиз, аввалроқ Қирғизистонда эркак Facebook’даги постлари учун ҳибсга олинган эди. Полиция маълумотларига кўра, ҳуқуқ-тартибот идоралари ходимлари ижтимоий тармоқлар мониторинги чоғида Facebook ижтимоий тармоғида “Берик Держинский” номли аккаунт эгаси томонидан мунтазам равишда мамлакат раҳбариятига йўлланган, ҳукумат амалдорларининг қонуний талабларига бўйсунмаслик ва ҳокимиятни зўравонлик билан эгаллаб олиш мақсадида оммавий тартибсизликлар уюштиришга чақирувчи салбий материаллар чоп этилгани аниқланган.