Россияда айиқни уриб юборган автомобиль унинг ҳужумига учради (видео)

Россиянинг Хабаровск ўлкасида Lexus айиқни уриб юборганидан сўнг унинг ҳужумига учради. Бу ҳақда “Gazeta.ru” хабар берди.

Қайд этилишича, дастлаб авотомобиль айиқни уриб юборган. Шундан сўнг омон қолган йиртқич машинага ҳужум қилган.

Ҳодиса Хабаровск-Лидога-Ванино автомобиль йўлининг 149-километрида содир бўлган. Воқеа гувоҳларининг айтишича, Lexus автомобили юқори тезликда ҳаракатланиб бораётган вақтда йўлни кесиб ўтаётган айиқни уриб юборган. Шунга қарамай айиқ тирик қолган ва оқсоқланиб келиб, автомобилга ҳужум қилган.

Жонивор Lexus'нинг капотини тишлари билан пачоқлаб, олд бамперга зарар етказган. Шунингдек, машинанинг олд ойнасини босган ва тўсиқдан ошиб, ўрмонга кириб кетган. Айиқ хавфсизлик ёстиқчалари очилгани учун салондаги йўловчиларни кўрмаган бўлиши мумкинлиги тахмин қилинмоқда.

Эслатиб ўтамиз, аввалроқ Италияда айиқ тонгги югуришга чиққан аёлни ўлдиргани учун ўлимга ҳукм қилинганди.