Россияда туғилишни кўпайтириш учун турмуш сифатини пасайтириш таклиф қилинди

Россия Давлат думаси депутати Олег Матвейчев ҳомилани олдиришни тақиқловчи қонун лойиҳаси муҳокамаси чоғида туғилиш даражасини ошириш учун аҳоли турмуш даражасини пасайтиришни таклиф қилди. Бу ҳақда “The Moscow Times” хабар берди.

Матвейчевнинг сўзларига кўра, демографик муаммоларни моддий шароитни яхшилаш орқали ҳал қилиш мумкин, деган ақидадан бутунлай воз кечиш керак. Одамлар қанчалик яхши яшаса, улар шунчалик кам болали бўлади. Туғилишнинг энг юқори кўрсаткичлари камбағал мамлакатларда, энг ёмони эса бойларда кузатилади.

Депутат ҳомилани олиб ташлашни ҳарбий йўқотишларга қиёслаб, бу ҳолатни Марказий ҳарбий округда одам ҳалок бўлиши билан тенглаштирган ва СССРда аборт қонунийлаштирилгач, давлатнинг ўзи Гитлердан кўра кўпроқ одам ўлдирганини таъкидлаган.

Шунингдек, болали оилаларни моддий қўллаб-қувватлаш ғоясини ҳам танқид остига олган.

“Аёлларнинг барчаси уй ва нафақа олишни, кейин фарзандли бўлишга рози бўлишини ҳохлайди. Лекин буларнинг барчаси ёлғон. Ҳозирги кунда аёллар ишни ва карьерани биринчи ўринга қўймоқда”, деган Олег Матвейчев.

Муҳокама чоғида яна бир депутат Виталий Милонов аёллар ҳомиласини олиб ташлашга кўпинча эркаклар босим ўтказишини айтган. Бошқа бир депутат Николай Николаев эса Россияни ўзининг ўта либерал рақибларига тақлид қилишда айблаб, тизимдаги асосий муаммоларга қарши курашишга чақирган. Унинг таъкидлашича, рус маданияти православликка асосланган ва шунинг учун боланинг ҳаёти туғилишидан олдин ҳам инсон сифатида тан олиниши керак.

Қайд этиш жоиз, Россияда 2025 йилнинг биринчи чорагида туғилганлар сони 288,8 минг болани ташкил этган бўлиб, бу ўтган йилга нисбатан 4 фоизга кам. Шунингдек, бу XVIII-XIX асрдан бери энг паст кўрсаткичдир. 2024 йилда 1,222 миллион бола туғилган. Бу 1999 йилдан бери энг паст кўрсаткич, дея қайд этилган. Мамлакатда вафот этганлар сони 1,8 миллиондан ошган ва йил давомида аҳолининг табиий қисқариши деярли 600 минг нафарни ташкил этган.

Эслатиб ўтамиз, аввалроқ Жанубий Корея Президенти Ли Чжэ Мён туғилишни ошириш учун иш вақтини қисқартириш ва 4 кунлик иш ҳафтасига ўтиш орқали туғилишни кўпайтиришни таклиф қилган эди.

Бунёд Келдибоев