Россия Запарожье АЭСда теракт тайёрламоқда – Зеленский

Россия Запарожье атом электр станциясида радиация сиздирилиши билан боғлиқ теракт тайёрламоқда. Бу ҳақда Украина Президенти Владимир Зеленский бугун, 22 июнь куни мамлакат хавфсизлик хизмати ҳисоботига таяниб хабар берди. 

Зеленскийнинг айтишича, Россия бунинг учун ҳамма нарсани тайёрлаган. Шунингдек, у радиация давлат чегараларини билмаслигини, у кимга зарар келтиришини фақат шамол йўналиши белгилаб беришини таъкидлаган. 

Эндиликда мамлакат Россиянинг ядровий объектда теракт тайёрлаётгани бўйича тўпланган барча маълумотларни ўзининг шериклари: Европа, Америка, Хитой, Бразилия, Ҳиндистон, Араб дунёси ва Африкага етказмоқчи. 

“Буни барча давлатлар ва халқаро ташкилотлар – мутлақо ҳамма билиши керак. Атом электр станцияларида ҳеч қачон террористик ҳужумлар бўлмаслиги керак. Бу сафар Каховкадагидек бўлмаслиги лозим”, дейди у. 

Зеленскийнинг қўшимча қилишича, Украина разведкаси Россия ҳарбийлари Каховка ГЭСининг тўғони ва бошқа иншоотларини айнан қандай портлатганига оид янги далилларни ҳам тўплаган.

“Бу босқинчиларнинг тўлиқ назорати остида бўлган станцияда мутлақо режалаштирилган жиноят эди”, дея таъкидлаган у. Украина етакчиси, шунингдек, бир йил аввал худди шу теракт ҳақида огоҳлантирганини эслатган. 

Зеленскийнинг гапларига нисбатан Россия Президенти Владимир Путиннинг матбуот котиби Дмитрий Песков муносабат билдириб, буни “навбатдаги сафсата”, деб атаган.