Россия Европадан 450 миллион евролик санкцияланган товарларни олган – “Bloomberg”

2023 йилнинг атиги тўққиз ойида Россия қиймати 450 миллион еврони ташкил қиладиган ҳарбий мақсадларда фойдаланиш мумкин бўлган санкцияланган товарлар ва технологияларни Европа Иттифоқидан олган. Бундан ташқари, товарларнинг деярли тўртдан бир қисми тўғридан тўғри Европа давлатларидан келган. Бу ҳақда кеча, 26 февраль куни савдо оқимлари бўйича маълумотлар таҳлилига таяниб, “Bloomberg” агентлиги хабар берди.

Манбага кўра, Украинада уруш бошланганидан кейин Европа Иттифоқи ва Россия ўртасида ушбу товарлар савдоси ҳажми камайган. Аммо худди шу товарларнинг Европа давлатларидан учинчи мамлакатларга, у ердан эса Россияга экспорти кескин ошган. “Bloomberg” санкцияларни четлаб ўтган таъминот билан шуғулланадиган давлатлар орасида Туркия, БАА, Сербия ва Хитойни, шунингдек, Ўзбекистон, Қозоғистон, Қирғизистон ва Арманистонни санаб ўтган.

Шунингдек, санкцияланган маҳсулотларнинг бир қисми европалик ишлаб чиқарувчиларнинг хорижий шуъба корхоналари томонидан тайёрлангани ва учинчи давлатлар орқали Россияга экспорт қилинаётгани ҳам аниқланган.

Қайд этиш жоизки, Россиянинг Украинага кенг кўламли бостириб киришининг икки йиллиги арафасида Европа Иттифоқи янги санкциялар жорий қилди. Хусусан, янги рўйхатдан Шимолий Корея қуролларини Россияга етказиб бериш билан боғлиқ 10 та компания ва жисмоний шахслар ҳам ўрин олган. Улар орасида КХДР Мудофаа вазири, шунингдек, Беларусдаги Россия армиясига ёрдам кўрсатаётган бир қанча компания ва жисмоний шахслар бор.

Бундан ташқари, ЕИ Кенгаши “қора рўйхат”га 27 та янги ташкилотни қўшди. Улар орасида тўртта Хитой компанияси ҳамда Қозоғистон, Туркия, Ҳиндистон, Сербия, Таиланд ва Шри-Ланкадан биттадан компаниялар бор.

Эслатиб ўтамиз, олдинроқ “Sky News” Буюк Британия компаниялари Кавказ ва Марказий Осиё давлатлари орқали Россияга юзлаб миллион фунтлик асбоб-ускуналар ва механизмларни экспорт қилаётганини хабар қилганди.