Россия ва Украина асирлар ҳамда ярадорларни алмашди

Бугун, 19 апрель куни Россия ва Украина ўртасида асирлар ва ярадорлар алмашинуви бўлиб ўтди. Бу ҳақда Россия Мудофаа вазирлиги хабар берди. 

Маълум қилинишича, ушбу алмашинув йил бошидан буён тўртинчи марта амалга оширилмоқда.

Украина назорати остидаги ҳудудлардан 246 россиялик ҳарбий қайтган. Украинага ҳам 246 ҳарбий асир топширилган. Шунингдек, 31 ярадор аскар Украинага берилган бўлса, Россия 15 ярадорни қабул қилган.

“Ҳозирда барча россиялик ҳарбий хизматчилар Беларусь ҳудудида бўлиб, уларга зарур психологик ва тиббий ёрдам кўрсатилмоқда, шунингдек, қариндошлари билан боғланиш имконияти яратилган”, дейилади хабарда.

Қўшимча қилинишича, ҳарбийларни асирликдан қайтаришда Бирлашган Араб Амирликлари воситачилик ҳаракатларини амалга оширган.

Маълумот учун, томонлар шу вақтгача БАА воситачилигида 3,2 мингдан ортиқ кишини бир-бирига топширган.

Эслатиб ўтамиз, бугун, 19 апрель куни Россия Президенти Владимир Путин Пасха байрами муносабати билан сулҳ эълон қилган эди. Путинга кўра, Россия барча жанговар ҳаракатларни тўхтатади ва “Украина томони ҳам бу ташаббусга амал қилади”.