“Россия ва Украина ака-ука”. Путин Украина ҳақида нималар деди?

north_east

“Путин ютди”. Аляскадаги саммитга ОАВ қандай муносабат билдирди?

Россия ва Украина ака-ука халқ. Украинада бўлаётган воқеалар Россия учун оғир фожиадир. Бу ҳақда Россия Президенти Владимир Путин кеча, 15 август куни Алясканинг Анкориж шаҳрида АҚШ Президенти Дональд Трамп билан ўтказилган музокаралардан сўнг, матбуот анжуманида сўз очди.

Путиннинг таъкидлашича, Россия учун Украинадаги воқеалар миллий хавфсизликка асосий таҳдидлар билан боғлиқ. Унга кўра, барқарор ва узоқ муддатли тинчликка эришиш учун инқирознинг асосий илдиз сабабларини бартараф этиш, Россиянинг қонуний хавфсизлик масалаларини инобатга олиш ва Европа ҳамда бутун дунёда адолатли хавфсизлик мувозанатини тиклаш зарур.

Путин Россия ва Украинани “ака-ука халқ” деб атаган ва бўлаётган воқеаларни Россия учун “фожиа ва оғир дард” сифатида таърифлаган. У, шунингдек, Трамп билан бир фикрда эканини билдирган ҳолда, Украинага ҳам хавфсизлик кафолатлари таъминланиши лозимлигини айтган ва бунга тайёрликларини маълум қилган.

Президент Россия ва АҚШ учрашувлари сўнгги тўрт йилдан буён ўтказилмаганини эслатиб, икки томонлама алоқалар совуқ урушдан бери энг паст даражага тушиб кетганини қайд этган.

“Эртами-кечми вазиятни тўғрилаш, конфронтациядан диалогга ўтиш зарур эди ва шахсий учрашув чиндан ҳам пишиб етилган эди”, деган Россия раҳбари. 

Путиннинг сўзларига кўра, эришилган ютуқлар тинчликка олиб келиши мумкин ва бу йўлда Киев ҳам, Европа пойтахтлари ҳам конструктив ёндашиши лозим.

Шунингдек, Путин келишувлар нафақат Украина муаммосини ҳал қилиш, балки Россия ва АҚШ ўртасида амалий ва прагматик муносабатларни қайта тиклаш учун ҳам асос бўлишига умид билдирган. 

У нутқининг якунида 2022 йилда АҚШнинг олдинги маъмурияти билан ўтказилган сўнгги мулоқотларни эслаб, ўшанда ҳарбий тўқнашув хавфи ҳақида огоҳлантирганини, аммо огоҳлантиришлари инобатга олинмаганини айтган.

Путин Трампнинг “Агар мен Президент бўлганимда, уруш бўлмаган бўларди” деган сўзларига қўшилган ва улар ўртасида яхши, ишчан ва ишончли алоқа ўрнатилганини таъкидлаган.

“Биз шу йўлдан тезроқ юриб, Украинадаги можаронинг тугашига эришамиз, бунга барча асослар бор”, дея ўз чиқишини якунлаган Путин. 

Эслатиб ўтамиз, аввалроқ АҚШ Президенти Дональд Трамп Аляскадан қайтаётганда украиналик мавқедоши Владимир Зеленский билан узоқ суҳбатлашгани ҳақида хабар берилганди.