Россия Украинада вақтинчалик сулҳга қарши – Кремль (видео)

Москва Украинада вақтинчалик сулҳга қарши ва узоқ муддатли низони ҳал этишдан манфаатдор. Бу ҳақда Россия Президенти Владимир Путиннинг ёрдамчиси Юрий Ушаков “Россия-1” телеканалига берган интервьюсида маълум қилди.

“Бизнинг мақсадимиз – узоқ муддатли тинчлик йўли билан келишувга эришиш, биз бунга интиламиз. Бу келишув Россиянинг қонуний манфаатларини ва хавотирларини ҳисобга олиши керак. Фақат сулҳни тақлид қилувчи чора-тадбирларнинг ҳеч кимга фойдаси йўқ”, деди Ушаков.

Унинг сўзларига кўра, у АҚШ миллий хавфсизлик бўйича маслаҳатчиси Майкл Уолтц билан суҳбатда Россиянинг бу борадаги позициясини тушунтирган.

“Мен, табиийки, вақтинчалик сулҳ бўйича келишувларни шарҳладим ва бу биз учун фақат украин ҳарбийларига нафас ростлаш учун берилган имкониятдан бошқа нарса эмаслигини айтдим”, деди Ушаков.

Путиннинг ёрдамчиси, шунингдек, Москва Вашингтоннинг Россиянинг Украина бўйича позициясини тушунишига умид қилишини ва сулҳни муҳокама қилиш жараёнида бу ҳисобга олиниши кераклигини таъкидлаган. У шу тариқа оммавий ахборот воситаларида пайдо бўлган Россиянинг Вашингтонга сулҳ шартлари бўйича ўз талабларини етказгани ҳақидаги хабарларга изоҳ берган.

Ушаковнинг чиқишидан бир неча соат олдин “Reuters” вазият билан таниш манбаларга таяниб, Россия АҚШга ўз талаблари рўйхатини тақдим этганини хабар қилган. Ушбу талаблар аввалроқ Москва томонидан Украина, АҚШ ва НАТОга билдирилган позицияга ўхшаш бўлиб, улар қуйидагиларни ўз ичига олади:

• Украинанинг НАТОга аъзо бўлишдан воз кечиши;
• Украинада хорижий қўшинлар жойлаштирилмаслиги;
• Россия томонидан босиб олинган Украина ҳудудларининг Россия таркибида тан олиниши.

Шунингдек, бугун, 13 март куни Ушаков АҚШ Президенти Дональд Трампнинг махсус элчиси Стив Уиткофф Москвага келгани ҳақидаги хабарларни изоҳлашдан бош тортган.

“Биз бундай алоқалар ёпиқ шаклда олиб борилиши бўйича келишиб олдик”, деди у.

Эслатиб ўтамиз, 11 март куни Саудия Арабистонининг Жидда шаҳрида АҚШ ва Украина делегациялари ўртасида тинчлик музокаралари бўлиб ўтди. Музокаралар натижасида Киев АҚШнинг 30 кунлик ўт очишни тўхтатиш таклифига рози бўлгани билдирилди. АҚШ Давлат котиби Марко Рубио ўз баёнотида “энди тўп Россия томонида” эканини таъкидлади. Унинг сўзларига кўра, агар Россия ижобий жавоб берса, сулҳ кучга киради ва ундан кейин тинчлик музокаралари бошланиши лозим.