Россия Озарбайжон билан кескинлик фонида Арманистондаги базасини тўлдирмоқда – разведка

Кремль Озарбайжон билан зиддиятли вазиятда Арманистондаги ҳарбий базани мустаҳкамламоқда. Бу ҳақда Украина разведкаси хабар берди.

Разведка хизматига кўра, можарога олдиндан тайёрланган Россия Ростов ва Волгоград вилоятлари, шунингдек, босиб олинган Қримда хизмат қилаётган ҳарбий хизматчиларни Гюмридаги базага ўтказмоқда.

Бундан ташқари, таъкидланишича, Россия Кавказнинг мазлум халқлари орасидан кўнгиллиларни фаол равишда жалб қилмоқда.

Разведканинг ёзишича, Кремлнинг бу қадами Россиянинг Жанубий Кавказ минтақасида таъсирини кучайтиришга қаратилган кенгроқ стратегиясининг бир қисмидир. Россия қўшинларининг Арманистонга киритилиши минтақадаги вазиятни беқарорлаштириш ва қўшни давлатларнинг позицияларини заифлаштиришга қаратилган. Разведканинг қайд этишича, Москва ва Баку ўртасидаги муносабатларнинг ёмонлашиши Россиянинг олдиндан режалаштирилган сценарийсининг бир қисми бўлиши мумкин. Хабарда келтирилишича, разведка Россия қўшинларининг Россия ичида ҳам, унинг чегараларидан ташқарида ҳаракатланишини ҳам диққат билан кузатишда давом этмоқда.

Арманистон Ташқи ишлар вазирлиги Украина Бош разведка бошқармасининг Россиянинг мамлакатдаги ҳарбий иштирокини кучайтириш ҳақидаги баёнотига изоҳ берди. Унда департамент матбуот котиби Ани Бадалян мамлакатнинг позицияси принципиал эканини ва Арманистон ҳудудидан учинчи давлатлар қўшни давлатларнинг бирортасига қарши ҳарбий амалиётлар ўтказиш учун фойдалана олмаслигини таъкидлади.