Россия ортидан Беларусь ҳам америкалик маҳбусни озод қилди

Беларусда АҚШ Президенти Дональд Трамп маъмуриятининг саъй-ҳаракатлари натижасида бир АҚШ фуқароси ва яна икки маҳбуснинг қамоқдан озод этилишига эришилди. Бу ҳақда кеча, 12 февраль куни CNN телеканалида АҚШнинг Литвадаги элчиси Кара Макдональд баёнот берди.

У озод этилган америкаликнинг исмини айтмади. Шу билан бирга, дипломат озод этилган одамларни “гаровга олинганлар”, уларнинг озод қилинишини эса “катта муваффақият” деб атади.

Ўз навбатида, АҚШ Давлат департаментининг Шарқий Европа бўйича масъул дипломати Крис Смитнинг айтишича, собиқ маҳбуслар Литвага олиб кетилган.

“Биз барча америкаликлар озод қилинмагунча ишимизни давом эттирамиз”, деди у.

Айни пайтда Оқ уй матбуот котиби Кэролайн Ливитт Вашингтон “бир америкалик ва яна икки киши Беларусдан хавфсиз озод қилинганини” тасдиқлаши мумкинлигини айтди. У ҳам озод қилинган америкаликнинг исмини айтмади.

CNN маълумотларига кўра, бу маҳбусларнинг озод этилиши Беларус ҳукмдори Александр Лукашенконинг 2025 йил январида Беларусда бўлиб ўтган баҳсли президентлик сайловларидан сўнг АҚШ Президенти Дональд Трампнинг илтифотига сазовор бўлиш истаги билан боғлиқ бўлиши мумкин.

Қайд этиш жоиз, 11 февраль куни АҚШ фуқароси Марк Фогель Россияда қамоқдан озод қилинди. У Англо-Америка мактабида дарс берган ва аввалроқ АҚШнинг Москвадаги элчихонаси ходими эди.

2021 йилда Фогель Шереметьево аэропортида ҳибсга олинган. Унга гиёҳвандлик воситалари ва психотроп моддаларни контрабанда ва қонунга хилоф равишда олиш, сақлаш, ташиш ва ишлаб чиқаришда айбланган. 2022 йилда бу одам гиёҳванд моддалар контрабандасида айбланиб, 14 йилга қаттиқ режимли қамоқ жазосига ҳукм қилинган.

Фогелнинг таъкидлашича, у ўмуртқа жарроҳлик амалиётидан кейин тиббий сабабларга кўра марихуана ишлатган.

north_east

Путин собиқ маҳбусларни аэропортда шахсан кутиб олди (видео)

ОАВ хабарларига кўра, Фогель эвазига АҚШ россиялик маҳбус Александр Винникни озод қилади. У  BTC-e крипто алмашинувининг ҳаммуаллифидир. АҚШда у каби 4 миллиард долларни ювганларга 50 йилгача қамоқ жазоси тайинланади.

Винник 2017 йилда товламачилик, шахсни ўғирлаш ва гиёҳванд моддалар савдосига ёрдам беришда айбланиб ,ҳибсга олинган эди. 2024 йилда у пул ювиш учун фитна уюштирганликда айбини тан олди. Бироқ унга ҳукм ўқилмади.

Эслатиб ўтамиз, ўтган йил 1 августда Туркия Миллий разведка ташкилоти воситачилигида 7 та давлатдан 26 маҳбусни алмашиш бўйича операция ўтказилганди. Алмашувда Россия, Беларусь, АҚШ, Германия, Польша, Словения ва Норвегия вакиллари иштирок этган. 10 киши Россияга жўнатилган, улардан икки нафари бола. Яна 13 киши Германияга, 3 киши АҚШга топширилган.