Россия Хитой учун газ нархини пасайтирмоқчи

Россия ҳукумати Хитой учун бериладиган газ нархини янада пасайтиришни режалаштирмоқда. Бу ҳақда Россиянинг Иқтисодий ривожланиш вазирлиги прогнозига таяниб, “The Moscow Times” хабар берди.

Маълум қилинишича, Хитой 2024 йилда “Сибир кучи” қувури орқали етказиб берилган минг куб метр газ учун 267,6 доллар тўлаган. Нарх Европа ва Туркия томонидан тўланган нархдан 30 фоизга (минг куб учун 376,9 доллар) паст.

2025 йилда “Газпром” газининг нархи Хитой учун 247,3 долларгача пасайган, европалик ва туркиялик харидорлар учун эса, аксинча, минг куб метр учун 403 долларгача кўтарилган. Шундай қилиб, чегирма 39 фоизга етган ва минг куб метр учун 150 доллардан ошган.

“2026 йилда ҳукумат Хитой учун газ нархини яна бироз пасайтиришни режалаштирмоқда – минг куб учун 241,8 долларгача”, дейилади хабарда.

Қайд этилишича, газ экспорт нархининг пасайиши ва нефть нархларининг кескин тушиши Россия иқтисодиётининг валюта тушумларига салбий таъсир кўрсатиши мумкин. Тахминларга кўра, жорий йилда углеводородлар экспортидан кутилган 236 миллиард доллар ўрнига 200 миллиард доллар даромад олиниши, 2026 йилда эса валюта тушуми дастлабки прогноздан 9 миллиард долларга кам бўлиши кутилмоқда.

Ўтган йили “Газпром” Хитойга 31 миллиард куб метр газ экспорт қилган. “Газпром”нинг ҳисоб-китобларига кўра, 2025 йилда компания бюджетидаги умумий камомат 15 триллион рублни (жорий курс бўйича қарийб 179 миллиард доллар) ташкил этади.

Эслатиб ўтамиз, аввалроқ Хитой савдо уруши кучайгани сабабли АҚШдан суюлтирилган газ импортини тўлиқ тўхтатгани ҳақида хабар берилганди.  Американинг охирги суюлтирилган газ партияси жорий йилнинг 6 февраль куни Хитойнинг Фуцзянь провинциясига етиб борган.