Хитой АҚШдан суюлтирилган газ импортини тўлиқ тўхтатди – FT

Хитой савдо уруши кучайгани сабабли АҚШдан суюлтирилган газ импортини тўлиқ тўхтатди. Бу ҳақда “Financial Times” хабар берди.

Нашрнинг ёзишича, Американинг охирги суюлтирилган газ партияси жорий йилнинг 6 февраль куни Хитойнинг Фуцзянь провинциясига етиб борган. Шундан кейин янги партия қайд этилмаган. Ҳатто бир газ танкери тарифлар кучга киришидан олдин йўлга чиққан ва Хитойга етиб боришга улгурмай, Бангладешга йўналтирилган. 

“Тарифлар амалда эмбаргога айланган сари, биз суюлтирилган газ глобал оқимларининг қайта тақсимланаётганига гувоҳмиз”, дея изоҳ берган ҳолатга Energy Aspects консалтинг компанияси эксперти Ричард Бронз.

Бронзнинг фикрича, Осиёдаги умумий суюлтирилган газ талаби 5-10 миллион тоннага камайиши мумкин, бу эса Европадаги газ нархларининг бироз пасайишига олиб келади.

Хитой компанияларида АҚШ терминалларидан суюлтирилган газ етказиб бериш бўйича 2049 йилгача мўлжалланган 13 та узоқ муддатли шартнома мавжуд бўлса-да, мутахассислар уларга амал қилиниш эҳтимоли жуда паст деб ҳисобламоқда.

Колумбия университети қошидаги Глобал энергетика сиёсати маркази мутахассиси Анна-Софи Корбо бунга изоҳ берган.

“Хитойлик импортёрлар америкаликлар билан суюлтирилган газ бўйича янги шартномалар тузиш эҳтимоли жуда кам”, дейди у.

Эслатиб ўтамиз, АҚШ Президенти Дональд Трамп 2 апрель куни 185 мамлакат ва ҳудуддан импорт қилинадиган маҳсулотларга бож тарифлари жорий этилганини эълон қилган эди. Унга кўра, универсал тарифлар 10 фоиз миқдорида 5 апрель куни кучга кирган. Алоҳида тарифлар эса 9 апрелдан бошлаб амал қилмоқда. Шу билан бирга, Трамп бир қанча мамлакатларга нисбатан қўлланган ўзаро жавоб тариқасидаги тарифларни 90 кунлик муддатга тўхтатиб қўйганини ҳам эълон қилди. Хитой маҳсулотларига нисбатан эса тарифлар 125 фоизгача кўтарилди, бундан ташқари, илгарироқ жорий этилган 20 фоизлик бож (КХДР, Канада ва Мексика ҳукумати фентанил контрабандаси билан етарлича курашмаётгани сабабли) ҳам амалда қолмоқда.

Оқибатда ҳозирда Хитойдан АҚШга олиб кириладиган товарларга умумий тариф ставкаси 145 фоизга етган.