Rossiya qiruvchi samolyotlari Estoniya chegarasini buzib o‘tdi

Rossiyaning uchta MiG-31 qiruvchi samolyoti Vayndlo oroli yaqinidagi Finlyandiya ko‘rfazi orqali Estoniya havo hududiga ruxsatsiz kirib bordi va u yerda taxminan 12 daqiqa qoldi. Bu haqda bugun, 19 sentyabr kuni Estoniya Mudofaa kuchlari bosh shtabi matbuot xizmatiga tayanib, Estoniya jamoat teleradiokompaniyasi xabar berdi.

Xabarda aytilishicha, samolyotda parvoz rejalari bo‘lmagan va ularning transponderlari (qabul qilingan signalga javoban signal yuboruvchi uzatgichlar) o‘chirilgan. Shuningdek, qoidabuzarlik vaqtida Estoniya havo harakatini boshqarish bilan ikki tomonlama radio aloqasi ham bo‘lmagan.

Estoniya Tashqi ishlar vazirligi bugunning o‘zidayoq Rossiyaning rasmiy Tallindagi muvaqqat ishlar vakilini chaqirib, unga norozilik notasini topshirdi.

Bu 2025 yilda Rossiya samolyotlarining Estoniya chegarasini to‘rtinchi marta buzishi bo‘ldi. 7 sentyabr kuni Mi-8 vertolyoti ham Vayndlo oroli yaqinida Estoniya havo hududini buzgan edi. 22 iyun kuni esa xuddi shu mintaqada Rossiya Favqulodda vaziyatlar vazirligining Il-76 transport samolyoti Estoniya havo hududiga ruxsatsiz kirgandi.

“Rossiya joriy yilda to‘rt marta Estoniya havo hududini buzdi, bu o‘z-o‘zidan qabul qilib bo‘lmaydigan holat, biroq bizning havo hududimizga uchta qiruvchi samolyot kirib kelgan bugungi qoidabuzarlik misli ko‘rilmagan darajada beadablikdir”, dedi Tashqi ishlar vaziri Margus Saxkna.

Yevropa Ittifoqining ijtimoiy va tashqi siyosat bo‘yicha oliy vakili Kaya Kallas qiruvchi samolyotlar tomonidan chegaraning buzib o‘tilishiga quyidagicha munosabat bildirgan:

“Bugun Rossiya harbiy samolyotlarining Estoniya havo hududini buzishi o‘ta xavfli provokatsiyadir. Bu oxirgi kunlarda Yevropa Ittifoqi havo hududining uchinchi buzilishi bo‘lib, mintaqadagi keskinlikni yanada kuchaytirmoqda. Yevropa Ittifoqi Estoniya bilan to‘liq birdam”, yozadi u.

10 sentyabrga o‘tar kechasi Rossiyaning kamida 19 ta droni Polsha chegarasini kesib o‘tgandi, ularning katta qismi Belarusdan kelib chiqqan. Polsha samolyotlaridan tashqari boshqa NATO davlatlarining qiruvchi samolyotlari dronlarni tutib olish uchun joylashtirildi. Varshava, Rossiya ataylab Polshaga hujum qilganini va Shimoliy Atlantika shartnomasining 4-moddasiga muvofiq NATO ittifoqchilari bilan maslahatlashishni so‘raganini bildirdi.

Eslatib o‘tamiz, joriy yilning 28 avgust kuni Polshada aviashou mashqi vaqtida F-16 qiruvchi samolyoti halokatga uchragandi. Oqibatda uchuvchi halok bo‘lgandi.