Россия Эронга “саҳна ортида” жиддий ёрдам бермоқда – CNN

Россия Эронга АҚШ ҳарбий кучларининг жойлашуви ва ҳаракати ҳақида разведка маълумотлари узатмоқда. Бу Москва Эронга қарши уруш фонида билвосита иштирок этаётганини кўрсатувчи илк маълумотлардан бири ҳисобланади. Бу ҳақда CNN хабар берди.

Қайд этилишича, берилган маълумотларнинг катта қисми Россиянинг сунъий йўлдошлари орқали олинган тасвирлардан иборат. Уларда АҚШ қўшинлари, кемалари ва ҳарбий самолётларининг жойлашуви акс этган.

Ҳозирча Эрон томонидан амалга оширилган аниқ бир ҳужум Россия разведкаси маълумотлари билан бевосита боғлиқ экани тасдиқланмаган. Бироқ сўнгги кунларда Теҳрон дронлари Пентагон ҳарбийлари жойлашган бир нечта ҳудудларга зарба берган. Масалан, Кувайтдаги ҳарбий объектга қилинган дрон ҳужумида олти нафар америкалик аскар ҳалок бўлган.

Айрим разведка манбалари бу ҳолат Россия ва Эрон ўртасидаги яқин ҳамкорлик давом этаётганини кўрсатишини таъкидламоқда. Шу билан бирга, АҚШ разведкаси Хитой ҳам Эронга молиявий ёрдам, эҳтиёт қисмлар ва ракета компонентлари бериш имкониятини кўриб чиқаётгани ҳақида маълумотларга эга. Бироқ Пекин ҳозирча урушга тўғридан тўғри аралашмаган.

ХХР позицияси нисбатан эҳтиёткор. Пекин Эрон нефтига боғлиқ бўлгани сабаб уруш тезроқ тугашидан манфаатдор. Пентагон маълумотига кўра, Эронга қарши АҚШ ҳарбий амалиётида 50 мингдан ортиқ ҳарбий хизматчи, 200 дан зиёд жангчи самолёт ва икки авиаташувчи иштирок этмоқда. Вашингтоннинг асосий мақсади Теҳроннинг баллистик ракета имкониятларини йўқ қилишдан иборат экани иддао қилинади.

Эслатиб ўтамиз, аввалроқ Россия Президентининг матбуот котиби Дмитрий Песков Яқин Шарқдаги кескинлик ортиб бораётган бир вақтда, Кремль Эрондан ёрдам кўрсатиш, жумладан, қурол-яроғ етказиб бериш бўйича ҳеч қандай мурожаат олмаганини айтган эди.