Россия дунёда ягона бўлган қуролини синовдан ўтказди (видео)

Россия Президенти Владимир Путин жорий йилнинг 28 октябрь куни “Посейдон” номли экипажсиз сувости аппаратини синовдан ўтказганини маълум қилди. Бу ҳақда у журналистлар билан ўтказган учрашувида сўз очди.

“Кеча биз истиқболли воситалардан яна бирининг синовини ўтказдик – бу экипажсиз сувости аппарати “Посейдон”. У ҳам ядровий энергия тизимига эга. Биз илк бор уни ташувчи сувости кемасини фойдаланишга топширибгина қолмай, балки аппаратнинг ядровий энергия қурилмасини ҳам ишга туширдик ва у маълум вақт давомида фаолият юритди”, деган Путин. 

У бу натижани “улкан ютуқ” деб атаган. Президентнинг сўзларига кўра, “Посейдон”нинг ўлчамлари кичик, бироқ унинг қуввати “Сармат” деб номланган энг замонавий қитъалараро ракеталарникидан ҳам юқори.

“Бундан ташқари, тезлик ва чуқурлик бўйича бу аппаратга тенг келадигани дунёда йўқ ва яқин орада пайдо бўлиши ҳам даргумон. Уни тўхтатиш ёки тутиб олишнинг имкони мавжуд эмас”, деган Путин. 

Маълумот учун, “Посейдон” – бу ядровий энергия тизимига эга экипажсиз сувости аппарати бўлиб, у одатий ёки ядровий жанговар каллаклар билан жиҳозланиши мумкин. “Посейдон” икки мегатоннагача ядровий қувватга эга жанговар каллакни олиб юришга қодир ва унинг максимал ҳаракат тезлиги соатига 200 километрга етиши мумкин. Россия денгиз флоти тўртта сувости кемасига жойлаштириладиган 32 тагача “Посейдон” аппаратини қабул қилиши режалаштирилган.

2018 йилнинг март ойида Владимир Путин Россияда катта чуқурликда замонавий сувости кемалари, торпедалар ва ҳар қандай юзаки ҳарбий кемалардан анча тез ҳаракатлана оладиган сувости дронлари ишлаб чиқилганини илк бор эълон қилган. Бир йил ўтиб, Россия Мудофаа вазирлиги “Посейдон” синовларининг видеосини эълон қилган.

Эслатиб ўтамиз, аввалроқ Россия Бош штаби бошлиғи Валерий Герасимов Президент Владимир Путинга “Буревестник” ядровий ракетасининг муваффақиятли синов ҳақида хабар берганди. Унинг сўзларига кўра, ракета 15 соат ичида тахминан 14 000 км масофани босиб ўтган ва бу уни ёқилғи қуйишсиз бутун дунё бўйлаб айланиб чиқишига бемалол етади.

АҚШ Президенти Дональд Трамп “Буревестник” синовига изоҳ берар экан, Путиннинг бу борадаги баёнотларини “ноўрин” деб атаган. Трамп, шунингдек, “бизда дунёдаги энг яхши атом сувости кемаси бор. Шунинг учун бизга саккиз минг миль учадиган ракета керак эмас” деган.