Россия дронлари Украинадаги портга ҳужум қилди

Олам

image

Россия дронлари Украина жанубидаги порт инфратузилмасига зарар етказди. Бу ҳақда бугун, 13 февраль куни Украина расмийлари хабар берди.

Айни пайтда қўшни Молдова ўз ҳудудида иккита дрон портлаганини маълум қилган бўлса, НАТО аъзоси Руминия ҳаво ҳудуди бузилган бўлиши мумкинлигини билдирди.

Киевнинг хабар беришича, Москва кеча, 12 февраль куни тунда 140 та дрон билан Украинага ҳужум қилган. Одесса вилоятининг Руминия ва Молдова билан чегарадош Измоил туманидаги зарба оқибатида бир киши жароҳат олган.

Фавқулодда хизматлар тарқатган суратларда қутқарувчилар ҳужум жойида ёнғинни ўчиргани акс этган, бироқ зарбанинг аниқ жойи айтилмаган. Расмийлар кўпинча хавфсизлик нуқтаи назаридан бундай маълумотларни ошкор қилмайди.

Одесса вилояти Украинанинг Қора денгиз орқали экспорти учун асосий марказ ҳисобланади ва унинг порт инфратузилмаси 2022 йил февраль ойида Москва бошлаган урушдан бери мунтазам равишда Россия зарбаларига учраган.

Молдова Президенти Майя Санду Россиянинг икки дрони мамлакат ҳаво ҳудудини бузиб, унинг ҳудудида портлагани “молдоваликлар ҳаётини хавф остига қўйгани”ни айтди.

“Россия чегараларни ҳурмат қилмайди, тинч аҳолига ҳужум қилади, қўрқув сепади... Бизни тинч қўйинг”, деб ёзди у Х ижтимоий тармоғида.

Молдова Ташқи ишлар вазири Михаил Попшой вазирлик воқеалар юзасидан Россия элчисини чақиришини айтди.

Руминия Мудофаа вазирлиги икки дрон мамлакат ҳаво ҳудудини бузган бўлиши мумкинлигини билдирди.

Украина ҳарбийларининг хабар беришича, 140 та дрондан 85 тасини уриб туширишга муваффақ бўлган, яна 52 таси эса электрон ускуналар туфайли ўз мақсадларига ета олмаган.

Россия эса Украинадаги тинч аҳоли нишонлари ёки тинч аҳолини атайлаб нишонга олганини бир неча бор рад этиб келади. 


Мақола муаллифи

Теглар

Россия Молдова Украина дрон Руминия

Баҳолаганлар

0

Рейтинг

3

Мақолага баҳо беринг

Дўстларингиз билан улашинг