Россия чуқур турғунликка тайёрланяпти – “Bloomberg”

Россия узоқроқ ва чуқурроқ турғунликка дуч келиши мумкин, чунки АҚШ ва Европа санкциялари мамлакат иқтисодиёти учун йиллар давомида таяниб келган тармоқларга таҳдид солмоқда. Бу ҳақда “Bloomberg” Россия ҳукумати учун тайёрланган ички ҳисоботга таяниб ёзмоқда.

Агентлик маълумотларига кўра, Украинага бостириб кириши муносабати билан “Россиянинг иқтисодий яккаланишининг ҳақиқий таъсирини баҳолаш” мақсадида амалдорлар ва экспертлар бир неча ойлар давомида ишлаган ҳужжат “аниқроқ тасвирни”ни намойиш қилади.

Ҳисоботда келтирилган учта сценарийдан иккитаси 2023 йилда ялпи ички маҳсулотнинг пасайиши тезлашишини ва иқтисодиёт фақат ўн йиллик охирида ёки ундан кейин урушдан олдинги даражага қайтишини кўрсатади. “Одатдагидек бизнес” сценарийси иқтисод келаси йил пасайишини ва 2021 йилга нисбатан 8,3 фоизга тушишини назарда тутади. “Стресс” сценарийсига кўра, ЯИМнинг максимал пасайиши 2024 йилда кутилмоқда – ўтган йил даражасидан 11,9 фоизга паст.

Барча сценарийларда санкциялар босими ортиб бораётгани ва уларга кўпроқ мамлакатлар қўшилиши мумкинлиги инобатга олинган.

Ҳукумат ҳисоботида айтилишича, Европанинг Россия нефть ва газидан кескин чекиниши Кремлнинг ўз бозорини озиқлантириш қобилиятига путур етказиши мумкин.