Россия БМТ қароргоҳини Нью-Йоркдан кўчиришни таклиф қилди

Россия Ташқи Ишлар вазирлиги халқаро ташкилотлар департаменти директори Пётр Иличев БМТ штаб-квартирасини Нью-Йоркдан нейтралроқ нуқтага, масалан, Женева ёки Венага кўчиришни таклиф қилди. Шунингдек, у АҚШни ташкилот штаб-квартираси жойлашган давлат мақоми тўғрисидаги келишувга риоя қилмаётганликда айблаган. 

Гап шундаки, апрель ойида Бирлашган Миллатлар Ташкилоти Хавфсизлик кенгашига раислик қилаётган Россиянинг Ташқи ишлар вазири Сергей Лавров 24-25 апрель кунлари Нью-Йоркка борди. Аммо АҚШ Лавровга Нью-Йорк сафарида ҳамроҳлик қиладиган россиялик журналистларга виза бермади. Ўзига ҳам узоқ вақт виза ололмаган Лавров Россия буни унутмаслигини айтди.

БМТ Бош котиби Антониу Гутерришнинг матбуот котиби Стефан Дюжаррик ташкилот штаб-квартирасининг жойлашуви тўғрисида қарор қабул қилиш Бош котиб ваколатига кирмаслиги, буни БМТга аъзо давлатлар ҳал қилиши кераклигини айтди. 

“БМТ штаб-квартирасининг қаерда жойлашиши ёки йиғилишлар қаерда ўтказилиши масаласи Бош котибнинг эмас, балки аъзо давлатларнинг қарори”, дейди Гутерришнинг матбуот котиби.