Россия баллистик ракета учирилишидан ярим соат олдин АҚШни огоҳлантирган – Песков

Россия Украинага ўрта масофага мўлжалланган “Орешник” баллистик ракетаси учирилишидан ярим соат олдин АҚШни огоҳлантирган. Бу ҳақда Кремль матбуот котиби Дмитрий Песков маълум қилди.

“Россия томони америкаликларни автоматик равишда ишлайдиган ва АҚШнинг худди шундай тизими билан алоқа қиладиган Россия Ядровий хавфни камайтириш миллий маркази орқали “Орешник” ишга туширилиши ҳақида огоҳлантирди. Огоҳлантириш ракета учирилишидан 30 дақиқа олдин автоматик режимда юборилган”, деди Песков.

Унинг айтишича, Россия бу ҳақда ҳеч кимга хабар бериши шарт эмас, чунки гап ўрта масофага учувчи ракета ҳақида кетмоқда. Россиянинг бундай мажбуриятлари йўқ.

Пентагон матбуот котиби брифингда Қўшма Штатлар Россия томонидан ядровий хавфсизлик каналлари орқали “Орешник” учирилиши ҳақида огоҳлантирилганини тасдиқлади. Оқ уй матбуот котиби Карине Жан-Пьернинг айтишича, АҚШ "сўнгги кунларда Украина ва энг яқин иттифоқчиларини ҳужум хавфидан хабардор қилган".

Жан-Пьернинг қўшимча қилишича, Украинага янги зарба АҚШни ҳеч қандай тарзда ядро қуроли сиёсатини ўзгартиришга мажбурламайди.

Эслатиб ўтамиз, кеча, 21 ноябрь куни Россия Президенти Владимир Путин телевизион мурожаатида Россия Украина армиясининг Ғарбнинг узоқ масофали ракеталарини Россия ҳудудига ҳужум қилишига жавобан “Орешник” экспериментал баллистик ракета тизимини синовдан ўтказганини ва Днепрга зарба берганини айтганди.