Ана холос! Россия армияси Украинада ўқ-дориларни эшакларда ташишни бошлади (видео)

Украинадаги Россия қўшинлари илгари ҳужумлар учун фуқаролик автомобиллари ва электр скутерларидан фойдаланган бўлса, кескин транспорт етишмовчилиги сабаб энди улар эшак ва отлардан фойдаланишни бошлади. Бу ҳақда ҳарбий журналистларга таяниб, “The Moscow Times” хабар берди.

Telegram’даги “Кирилл Фёдоров/Война История Оружие” канали Мудофаа вазирлиги томонидан бир бўлинмага жўнатилган янги “от-арава транспорти” ҳақида ёзган.

“Аскарлар олдинги чизиққа ўқ-дориларни олиб бориш учун эшак билан таъминланди. Нима деб ўйлагандингиз? Машиналар бугунги кунда танқис!”, деб ёзади манбалар.

Маълум қилинишича, Россия Мудофаа вазирлигининг транспорт ва юк ташиш техникаси рўйхати ҳақидаги буйруғига кўра, юк ташиш воситаси сифатида ҳайвонлар, жумладан, эшак ва хачирлар ишлатилиши мумкин.

“Россия ҳарбийлари ҳануз ҳайратга солмоқда. Қўмондонлик бўлинмаларнинг логистика имкониятларини от-арава транспорти – эшак ва отлар ҳисобига кенгайтирмоқда”, деб ёзди ҳарбий таҳлилчи Ян Матеев.

Шунингдек, у бу ҳали кенг тарқалмагани, бироқ олти ой ичида вазият қандай ўзгаришини олдиндан айтиш қийинлигини таъкидлаган.

“Новая газета – Европа” нашри россиялик ҳарбий эксперт билан суҳбатлашган. У анонимлик шарти билан ушбу ҳолат, эҳтимол, жойлардаги ташаббус эканини айтган. Унинг фикрича, ҳайвонлардан кенг кўламда фойдаланиш эҳтимоли паст.

“Ташлаб кетилган хўжаликлардан эшак ёки от топиб, уларни ишлата бошлашмоқда. Эшак ёки от лой ва йўл мавжуд бўлмаган шароитда юриб, масалан, маҳсулот ёки ўқ-дориларни йўллардан узоқда жойлашган таянч пунктларга етказиб бера олади”, дейди эксперт.

Олдинроқ “Forbes” нашри ҳам Россия аскарлари фронтда отлардан фойдалаётганини хабар қилган. Нашр бу ҳақида ижтимоий тармоқларда тарқалган видео асосида хабар қилган. Видеода икки Россия аскари қишлоқ йўлида от миниб кетаётгани аск этган.

“Қаранг, болалар Украинада отни миниб олган”, дейди улардан бири.

Украина Ички ишлар вазири ўринбосари Антон Геращенко ушбу тасвирларга изоҳ берган.

“Дунёнинг иккинчи армияси” ўзининг асл қиёфасида. Россия империяси даврига қайтяпмиз – кавалериядан ва миллий озчилик вакилларини “гўшт тўпи” сифатида ишлатишдан воз кечилмаган. Бу аскарлар Саха Республикаси – табиий бойликларга жуда бой минтақадан. Бироқ Саха аҳолиси Украинада ўғирланган отларда жанг қилмоқда. Москва эса уларнинг олмос, олтин, газ ва нефтидан ўз ғазнасини тўлдиришда давом этмоқда”, деб ёзади у.

Маълумотларга кўра, Россиянинг Украинадаги тўлиқ миқёсли уруш бошлангандан бери йўқотган техникаси камида 20 минг 27 донани ташкил этади. “Oryx” портали томонидан тасдиқланган маълумотларга кўра, 3 мингдан ортиқ техника Украина ҳарбийлари томонидан қўлга олинган, яна 1113 таси ташлаб кетилган, 852 та техника зарар кўрган, 15 минг 51 таси эса йўқ қилинган. Россиянинг танк, БМП ва БТРлардаги йўқотишлари 12 минг бирликка етган. Улар орасида Т-54 ва Т-55 каби 13 та эскирган танк ҳамда 176 та энг замонавий Т-90 турли модификациялардаги танклар бор.

Эслатиб ўтамиз, аввалроқ Россиянинг Курск вилоятида рус қўшинлари билан бирга жанг қилган Шимолий Корея аскарлари январь ойи ўрталаридан бери йўқотишлар сабаб ҳарбий хизматдан четда қолгани хабар қилинганди. Ғарб, Жанубий Корея ва Украина разведка идоралари Пхеньян 2024 йил август ойида Украина кутилмаганда трансчегаравий ҳужум бошлаган Курск вилоятида жанг қилаётган Россия кучларини қўллаб-қувватлаш учун 10 мингдан ортиқ аскарини юборганини маълум қилган.