Россия ҳукумати бензин экспортини тақиқлаши мумкин

Россия ҳукумати мамлакатдан бензин экспортини тўлиқ тақиқлаш вариантини қайта кўриб чиқяпти. Бу ҳақда “Интерфакс” хабар берди.

Бу масала Яқин Шарқдаги уруш фонида ёқилғи нархлари кескин ошиб кетгани сабабли кун тартибига чиққан. Манбаларга кўра, тақиқ бир ойдан ҳам узоқроқ – тўлиқ чорак (тахминан 3 ой) давом этиши мумкин. Аввал ҳам бундай чекловлар жорий этилган ва 2026 йил 31 январда бекор қилинган эди. Ҳозирда эса экспорт чеклови фақат ишлаб чиқарувчи бўлмаган компанияларга тегишли.

Россия Бош вазири ўринбосари Александр Новак глобал энергия инқирози шароитида ички бозорни ёқилғи билан таъминлаш учун зудлик билан чоралар кўриш зарурлигини айтган. Унга кўра, нефть маҳсулотлари нархининг жаҳон бозорида кескин ошиши ички нархларга ҳам босим ўтказмоқда.

Ёқилғи нархлари февраль охиридан бери ўсиб бормоқда. Айнан шу пайтда АҚШ ва Исроил Эронга қарши ҳарбий операцияни бошлаган. Бу эса Ҳормуз бўғози орқали ўтадиган нефть ва газ етказиб беришга жиддий таъсир қилиб, глобал нархларнинг ошишига олиб келган.

Оқибатда Россияда ҳам улгуржи нархлар сезиларли кўтарилган: баҳордан бери бензин нархи 14 фоиз, дизель эса 22 фоизга ошган. 24 март ҳолатига кўра, Россиянинг Европа қисмида AI-92 бензини ва дизелнинг улгуржи нархи тахминан 68–67 минг рубль атрофида бўлган.

Яқин орада баҳорги экин экиш мавсуми бошланиши ва нефтни қайта ишлаш заводларида режали таъмирлаш ишлари олиб борилиши кутилмоқда. Бу эса ёқилғига талабни янада ошириб, нархларнинг яна кўтарилишига сабаб бўлиши мумкин.

Эслатиб ўтамиз, аввалроқ Эрон расмийлари “душман бўлмаган” давлатлар кемалари Ҳормуз бўғози орқали ўтиши мумкинлигини билдирганди. Унга кўра, Хитой, Россия, Ҳиндистон, Ироқ ва Покистон кемаларига ўтишга рухсат берилган.