“Россельхознадзор” Ўзбекистоннинг бешта экспортчисига тақиқ қўйди

“Россельхознадзор” 2026 йил 23 июлдан бошлаб Ўзбекистоннинг бешта экспортёридан Россияга карантин остидаги маҳсулотларни олиб киришни чеклайди. Бу ҳақда идора матбуот хизмати хабар берди. 

“Фитосанитария талабларини энг кўп бузган Ўзбекистоннинг 5 та экспортёридан келадиган карантин остидаги маҳсулотларнинг Россияга олиб кирилиши 2026 йил 23 июлдан чекланади. Улардан келаётган товарларнинг асосий қисмини карам ва гулкарам, пиёз, шивит, петрушка, узум, лавлаги, помидор ва бошқалар ташкил этади”, дейилади хабарда.

Идоранинг аниқлик киритишича, қарор Ўзбекистондан Россияга карантин остидаги маҳсулотларни етказиб беришда карантин объектларининг аниқланиши ҳолатлари кўпайгани, шунингдек, озиқ-овқат хавфсизлигини таъминлаш, Россия ҳудудининг фитосанитар фаровонлигини сақлаш, карантин объектларининг олиб кирилиши ва тарқалишининг олдини олиш мақсадида қабул қилинган.

Билдирилишича, биргина 2026 йил бошидан буён помидор меваларининг жигарранг ажин вируси (Tomato brown rugose fruit virus), Жанубий Америка помидор куяси (Tuta Absoluta (Meyrick), ғарбий (Калифорния) гул трипси (Frankliniella occidentalis Pergande), лавлаги томирларининг некротик сарғайиши бенивируси (Beet necrotic yellow vein depression virus) каби 132 та карантин объектлари аниқланган.

“Россия ва халқаро фитосанитария талабларининг мунтазам бузилиши Ўзбекистоннинг Россия бозорига етказиб берилаётган карантин остидаги маҳсулотлар хавфсизлигини таъминлаш тизими етарлича самарали эмаслигини тасдиқлайди”, дейилади “Россельхознадзор” хабарида. 

Идора Ўзбекистоннинг айнан қайси компанияларига нисбатан чекловлар киритилганини очиқламаган.