Роналду ва Жоржинанинг тўйи ҳақида нималар маълум?

Саудия Арабистонининг “Ал-Наср” клуби ҳужумчиси Криштиану Роналду ва унинг севгилиси Жоржина Родригеснинг тўйи жорий йил август ойининг биринчи дам олиш кунларида ўтказилиши мумкин. Бу ҳақда “The Sun” нашри хабар берди.

Хабарларга кўра, тўй маросими меҳмонлари орасида UFC юлдузлари Ҳабиб Нурмагомедов ва Конор Макгрегор, шунингдек, футбол ва шоу-бизнес оламининг машҳур вакиллари бўлиши кутилмоқда. Бироқ ҳозирча бу маълумотлар расман тасдиқланмаган.

“Gossip” журнали тарқатган маълумотга кўра, тўй жуда дабдабали ўтиши кутилмоқда. Таклиф этилган меҳмонлар рўйхатига “Реал Мадрид” футболчилари Килиан Мбаппе, Винисиус Жуниор ва Родриго, “Манчестер Юнайтед” афсонаси Рио Фердинанд, актёр Вин Дизель, қўшиқчи Женнифер Лопес, рэперлар Дрейк ва Трэвис Скотт, журналист Пирс Морган ҳамда блогер IShowSpeed киритилгани айтилмоқда.

Энг кўп муҳокама қилинаётган жиҳатлардан бири эса – Ҳабиб Нурмагомедов ва Конор Макгрегорнинг бир тадбирда иштирок этиши эҳтимолидир. Икки спортчи 2018 йилнинг октябрида UFC 229 турнирининг асосий жангида ўзаро тўқнашган ва Ҳабиб тўртинчи раундда ғалаба қозонган эди. Ўшандан бери уларнинг муносабатлари кескин бўлиб келмоқда.

Португалиянинг V+ Fama дастури таҳририяти ўз қўлига тушган таклифнома ҳақида маълум қилди. Унга кўра, маросим жорий йилнинг 2 август куни кечқурун Синтра шаҳридаги машҳур Quinta da Regaleira сарой-боғ мажмуасида бўлиб ўтиши режалаштирилган. Шунингдек, меҳмонлар учун қора либос кодекси белгилангани ҳам айтилди.

Бироқ Испаниянинг “HOLA” нашри бу маълумотларга шубҳа билан қарамоқда. Нашрнинг таъкидлашича, Quinta da Regaleira жорий йилнинг 2 август куни сайёҳлар учун очиқ бўлади ва ўша куни кечқурун у ерда концерт режалаштирилган. Шу боис, бундай кўламдаги тўйнинг айнан шу ерда ўтказилиши эҳтимоли паст деб баҳоланмоқда.

Бундан ташқари, кеча, 30 июль куни Роналду, Жоржина ва Криштиану кичик (Cristiano Jr.) Майоркага таътилга йўл олгани ҳақида хабарлар тарқалди. “Majorca Daily Bulletin” маълумотига кўра, оила ҳозирча яхтада дам олмоқда. Шунга қарамай, кўпчилик жуфтлик яқин вақт ичида никоҳдан ўтишини кутмоқда.

Эслатиб ўтамиз, аввалроқ, Роналду Жоржинага турмуш қуриш таклифини билдириб, бир неча миллион евро деб баҳоланаётган йирик овал олмосли узук совға қилган эди.

Шунингдек, у Жоржинага оқ рангли Porsche Taycan электромобили, Audemars Piguet ва Patek Philippe соатлари, Dior ва Louis Vuitton сумкалари ҳамда қимматбаҳо либослар ҳам совға қилган.

Пирс Морганга берган интервьюсида Роналду Жоржинани ҳаётидаги энг муҳим инсон деб атаган.

“Жоржина – менинг ҳаётимдаги аёл. Унга турмуш қуриш таклифини бериш табиий қарор эди. У мен ва оилам ҳақида ғамхўрлик қилади, мени тушунади. Мен айнан шундай инсонни излаганман. Биз Жаҳон чемпионатидан кейин турмуш қуришни режалаштирганмиз”, деган эди Роналду.

Маълумот учун, 40 ёшли Криштиану Роналду ва 32 ёшли Жоржина Родригес 2016 йилдан буён бирга яшаб келмоқда. Улар икки нафар қизни – Алана Мартина (2017 йил) ва Белла Эсмералдани (2022 йил) тарбияламоқда. Шунингдек, оилада кичик Криштиану (2010 йил) ҳамда эгизаклар Матео ва Ева (2017 йил) ҳам вояга етмоқда.