Роналду ва Жоржина бойлигини алоҳида ҳисоблашга келишди – ОАВ

Португалиялик футбол юлдузи Криштиану Роналду ва Жоржина Родригеснинг никоҳдан кейин ҳам ўз мулкларини алоҳида ҳисоблашга келишди. Бу ҳақда Португалиянинг “Jornal de Notícias” нашри хабар берди.

Жуфтлик жорий йилнинг 11 август куни Португалиянинг Кашкайш шаҳридаги қароргоҳида турмуш қурган эди. Меҳмонлар орасида Роналдунинг спортчилик фаолияти давридаги дўсти Мигел Пайсан, Жоржинанинг синглиси Ивана Родригес, испаниялик заргар Хосе Родригес Сангил ва унинг рафиқаси Моника Гонсалес Мартинес бўлган. Маросимда жуфтликнинг барча беш нафар фарзанди ҳам иштирок этган.

Нашр маълумотига кўра, Роналду ва Родригес алоҳида мулк режимини танлаган. Никоҳдан олдинги шартнома маросимдан бир кун аввал Лиссабондаги нотариал идорада имзоланган. Ушбу режим жуфтликка никоҳдан олдин мавжуд бўлган ва никоҳдан кейин орттирилган ўз активларини алоҳида сақлаш имконини беради.

Жуфтлик ўз фамилияларини сақлаб қолган ва яшаш жойи сифатида Саудия Арабистони пойтахти Ар-Риёдни кўрсатган.

Нашр шунингдек, маросимда Криштиану Роналдунинг онаси Долорес Авейру ҳамда футболчининг опа-сингиллари Элма ва Катя Авейру иштирок этмаганини хабар қилди.

Маълумот учун, Роналду ва Жоржина 2016 йилда Мадридда танишган. Ўша вақтда Жоржина “Gucci” доконида сотувчи бўлиб ишлаган. Жуфтликнинг илк расмий тадбиридаги иштироки 2017 йил 9 январь куни Цюрихда бўлиб ўтган “The Best” тақдирлаш маросимига тўғри келган. Унда Роналдунинг ўғли Криштиану Жуниор ҳам улар билан бирга бўлган.

2017 йил ноябрь ойида жуфтликнинг биринчи қизи Алана Мартина дунёга келган. 2022 йил апрель ойида Родригес эгизак фарзандларни дунёга келтирди. Қизи Белла Эсмеральда омон қолди, аммо ўғли Анхел туғруқ вақтида вафот этди. Шунингдек, жуфтлик эгизаклар Ева ва Матеони ҳам тарбияламоқда.

2025 йилнинг айнан 11 август куни, Роналду билан танишганидан тўққиз йил ўтиб, Жоржина Родригес расман унаштирилганини эълон қилган эди.