Роналду Қизил денгиз соҳилидан 2 та вилла сотиб олди

Португалия терма жамоаси сардори Криштиану Роналду ва Жоржина Родригес Қизил денгиз марказида жойлашган The Red Sea Residences мажмуасидан иккита ҳашаматли вилла харид қилди. Бу ҳақда “Marca” нашри хабар берди.

Ушбу масканга фақат чартер қайиғи ёки гидросамолёт орқали етиб бориш мумкин бўлиб, у юқори даражадаги махфийлик ва сокинликни таъминлайди.

“Энди бизнинг бу ерда уйимиз бор”,  деди Роналду Қизил денгизнинг бетакрор табиати уни ва Жоржинани илк ташрифдаёқ ўзига ром этганини таъкидлаган ҳолда. 

Унинг сўзларига кўра, у ерда уйга эга бўлиш уларга исталган вақтда тинч муҳитда, бегона нигоҳлардан йироқда оилавий вақт ўтказиш имконини беради.

Маълум қилинишича, ушбу қарор Роналду оиласининг ёлғизлик ва хотиржамликка бўлган эҳтиёжидан келиб чиққан бўлиб, шу билан бирга у дунёдаги энг эксклюзив ҳудудлардан бирига сармоя киритмоқда. Жуфтлик 2023 йилдан буён бу масканда ҳордиқ чиқариб келаётган эди, эндиликда эса бу ерда уч хонали ва икки хонали иккита виллага эгалик қилмоқда.

The Red Sea Residences бош директори Жон Пагано Роналду ва Родригесни кутиб олишдан мамнун эканини билдириб, уларнинг танлови ушбу ҳудуднинг ҳашамат, махфийлик ва табиат уйғунлигини қадрлайдиганлар учун нақадар жозибадор эканини яна бир бор тасдиқлашини айтган. 

Эслатиб ўтамиз, аввалроқ Криштиану Роналду ва Жоржина Родригесларнинг узоқ кутилган тўй маросими Роналдунинг туғилган шаҳри Фуншалда бўлиб ўтиши, никоҳ маросими 2026 йилги Жаҳон чемпионатидан кейин ёзда Фуншал католик черковининг йирик марказий ибодатхонасида ўтказилиши, зиёфат эса ҳашаматли меҳмонхонада давом эттирилиши ҳақида хабар берилган эди.