Роналду дунёнинг энг кўп маош олувчи спортчиси бўлди

Португалиялик футболчи Криштиану Роналду дунёнинг энг кўп маош олувчи спортчилари рейтингида 1-ўринни эгаллади. Бу ҳақда “Forbes” журнали ўзининг янгиланган энг бой спортчилар рейтингида маълум қилди.

Саудия Арабистонининг “Ал-Наср” клуби ҳужумчиси бир йилда 260 миллион доллар ишлаб топди, шундан 200 миллиони унинг клубдаги маоши, 60 миллиони эса реклама шартномаларидан келиб чиққан.

Қайд этилишича, бу кўрсаткич футболчилар учун рекорддир. Роналду фаолияти давомида тўртинчи марта ушбу рейтингда биринчи ўринни эгаллади.

Энг кўп маош олувчи спортчилар рўйхатида 2-ўринни испаниялик гольфчи Жон Рам эгаллади, унинг даромади 218 миллион долларни ташкил этди, 3-ўринни 135 миллион доллар ишлаб топган Американинг “Интер Майами” клубининг аргентиналик футболчиси Лионель Месси эгаллади.

Кучли ўнталикка “Лос-Анжелес Лейкерс” баскетболчиси Леброн Жеймс (128,2 миллион доллар), “Милуоки” баскетболчиси Жаннис Антетокунмпо (111 миллион доллар), ПСЖ футболчиси Килиан Мбаппе (110 миллион доллар), “Ал-Ҳилол” футболчиси Неймар (108 миллион доллар) кирди. “Ал-Иттиҳод” футболчиси Карим Безнзема (106 миллион доллар), “Голден Стейт” баскетболчиси Стивен Карри (102 миллион доллар) ва “Балтимор”да ўйнаётган америкалик футболчи Ламар Жексон (100,5 миллион доллар) кучли ўнликка якун ясаб берди.

Эътиборлиси, рейтингнинг кучли ўнлигига кирган барча спортчилар биринчи марта 100 миллион доллардан ортиқ даромад қилди.