Roberto Manchini yana Italiya terma jamoasi bosh murabbiyi bo‘ladi

Roberto Manchini Italiya milliy terma jamoasi bosh murabbiyi etib tayinlandi. Bu haqda Italiya futbol federatsiyasi (IFF) prezidenti Jovanni Malago “La Repubblica” nashriga bergan intervyusida ma’lum qildi.

Avvalroq, Italiya terma jamoasi bosh murabbiyligiga Andrea Pirlo asosiy nomzod sifatida ko‘rilayotgani haqida xabarlar tarqalgan edi. Biroq uning Rossiya bukmekerlik kompaniyasi bilan hamkorligi sababli tayinlov amalga oshmagan. Shundan so‘ng IFF texnik direktori Paolo Maldini hamda texnik direktor maslahatchisi Leonardo o‘z lavozimlarini tark etgan.

61 yoshli Manchini 2018-2023 yillarda ham Italiya terma jamoasini boshqargan. Uning qo‘l ostida jamoa 2021 yilgi Yevropa chempionatida g‘olib chiqqan, UEFA Millatlar ligasida ikki marta (2021 va 2023) bronza medalini qo‘lga kiritgan hamda terma jamoalar o‘rtasidagi 37 o‘yinlik mag‘lubiyatsiz seriyani qayd etgan. Biroq Manchini Italiyani 2022 yilgi Jahon chempionatiga olib chiqa olmagan.

Italiya terma jamoasidan ketgach, u Saudiya Arabistoni milliy jamoasi, keyin esa Qatarning “Al-Sadd” klubini boshqardi. Shuningdek, murabbiylik faoliyati davomida “Fiorentina”, “Latsio”, “Inter”, “Manchester Siti”, “Galatasaroy” va “Zenit” klublarida ishlagan.

Ma’lumot uchun, Manchini “Manchester Siti” bilan Angliya Premer-ligasi, Angliya Kubogi va Angliya Superkubogida g‘olib chiqqan. “Inter” bilan esa uch marta Italiya chempionligi va ikki marta Italiya Kubogini qo‘lga kiritgan.