Рейган иштирокидаги реклама сабаб Трамп Канада билан музокараларни тугатди

АҚШ Президенти Дональд Трамп АҚШнинг собиқ етакчиси Рональд Рейган иштирок этган реклама туфайли Канада билан барча савдо музокараларининг тугаганини эълон қилди. Бу ҳақда у ўзининг Truth Social ижтимоий тармоғида ёзиб қолдирди. 

“Рональд Рейган жамғармаси яқинда Канада Рональд Рейганнинг тарифлар ҳақида нотўғри гапирган сохта рекламасидан фойдаланганини эълон қилди”, дея ёзган Трамп. 

Оқ уй раҳбари тарифлар АҚШ миллий хавфсизлиги ва иқтисодиёти учун “жуда муҳим” эканини таъкидлаган. У Оттаванинг ҳаракатларини “қўпол” деб атаган. 

Канада октябрь ойида 75 миллион долларлик рекламани чиқаришни режалаштирган. Унда Рейганнинг 1987 йилдаги тарифлар бўйича нутқининг аудиоёзуви ишлатилган, рекламада у тарифларнинг узоқ муддатда самарасиз эканини айтган.

Маълумот учун, Рейган 2004 йилнинг ёзида 92 ёшида вафот этган. У 1981 йилдан 1989 йилгача Қўшма Штатлар президенти бўлган.

Ёзда Трамп Канадага тарифларни 25 фоиздан 35 фоизгача оширди. У буни фентанил контрабандаси ва Оттавадан келган жавоб чоралари билан боғлади. Бу қарор АҚШ-Мексика-Канада Эркин савдо шартномаси билан қамраб олинган товарларга таъсир қилмади.

Июнь ойида Оқ уй Канаданинг Amazon, Google, Uber, Airbnb каби Америка технология компанияларига янги хизматлар солиғини жорий қилгани сабабли Канада билан тариф бўйича музокараларни тўхтатди. Таклиф қилинган солиқ уларнинг фойдасига уч фоизли солиқ эди. 

Эслатиб ўтамиз, аввалроқ Канада Бош вазири Марк Карни мамлакати АҚШ маҳсулотларига қўйган айрим божларни бекор қилишини эълон қилганди. Маълумотларга кўра, 25 фоизлик божхона тўловлари АҚШдан импорт қилинадиган пўлат, алюминий ва автомобилларга нисбатан амалда қолади. Карни, шунингдек, икки томон савдо, инвестиция ва хавфсизлик соҳаларида ҳамкорликни кенгайтириш бўйича музокараларни давом эттиришини таъкидлаганди.