“Реал Мадрид” стадионининг номи ўзгармоқда

Испаниянинг “Реал Мадрид” жамоаси уй стадиони ҳисобланган “Сантьяго Бернабеу” номидан “Сантьяго” сўзи олиб ташлади. Клуб расмий ресурсларида ҳам эндиликда “Бернабеу” номи ишлатила бошланди. Бу ҳақда “Sport” нашри хабар берди.

Манбага кўра, клуб бу ўзгаришни идентификация ва тижорий мақсадларда амалга оширганини маълум қилди. Қисқа ном, уларнинг фикрича, глобал бозорларда самаралироқ ва замонавий бренд сиёсатига мос. Шу билан бирга, мухлисларнинг бир қисми бу қарорга қарши чиқиб, собиқ президент Сантьяго Бернабеунинг меросига беписандлик сифатида баҳоламоқда.

“Сантьягосиз Бернабеу бўлмайди. Эртага у “Adidas Бернабеу”, кейин “Emirates Бернабеу” бўлади ва бир неча йилдан сўнг клуб тарихидаги энг муҳим президент ким бўлганини ҳам билмайдиган авлод пайдо бўлади”, дея танқид қилмоқда мухлислар уюшмаси вакиллари.

Қайт этиш жоизки, стадион 1947 йилда “Нуэво Эстадио Чамартин” номи билан очилган, 1955 йилда эса ўша пайтдаги президент Сантьяго Бернабеу шарафига қайта номланган эди. 2019 йилда бошланган таъмирлаш ишлари учун 1,3 миллиард евродан ортиқ маблағ сарфланди. Янги фасад, технологиялар ва кўп мақсадли майдонларни ўз ичига олган лойиҳа ҳали ҳам давом этмоқда.

Клуб раҳбарияти Пасео-де-ла-Кастельяна фасадида “Бернабеу” ёзувини ўрнатишни режалаштирган. Бу билан стадионнинг янги тижорий брендини шакллантириш мақсад қилинган. “Реал Мадрид” узоқ йиллар давомида ном ҳомийлигини тижорийлаштиришга қарши бўлган, аммо ҳозирги шароит бунга ўзгариш киритмоқда.

Флорентино Перес раҳбарлигидаги клуб расмийлари бу ўзгаришни “номни замонавийлаштириш” сифатида баҳоласа, мухлисларнинг кўпчилиги “Сантиаго”нинг йўқолиши тарихий даврнинг якуни деб ҳисоблашмоқда.

Маълумот учун, клуб 2017 йилда Emirates компаниясининг ном ҳуқуқи бўйича 250 миллион евролик таклифи рад этилган эди.