“Реал Мадрид” футболчиси дисквалификация қилинди

Испаниянинг “Реал Мадрид” жамоаси ярим ҳимоячиси Франко Мастантуоно икки ўйинга дисквалификация қилинди. Бу ҳақда “Mundo Deportivo” нашри хабар берди.

Манбага кўра, футболчи Ла Лига 26-тури доирасида “Хетафе”га қарши ўйинда (0:1) ҳакамга айтган сўзлари сабаб икки ўйинга дисквалификация қилинган.

18 ёшли аргентиналик футболчи учрашувнинг сўнгги дақиқаларида майдондан четлатилган. Испания футбол федерацияси интизом қўмитаси матбуот хизмати маълумотига кўра, бош ҳакам Алехандро Муньис Руисга нисбатан норозилик билдирганидан сўнг тўғридан тўғри қизил карточка кўрсатган.

Расмий баёнотда айтилишича, футболчининг майдондан четлатилишига сабаб унинг ҳакамга қарата айтган: “Қандай шармандалик, қандай шармандалик”, деган сўзлари бўлган.

Шунингдек, “Реал Мадрид” ҳимоячилари Дин Хёйсен ва Альваро Каррерас ҳам жазоланган. Улар сариқ карточкалари йиғилиб қолганлиги сабаб битта ўйинга дисквалификация қилинган. Шунинг учун учала футболчи ҳам эртага, 6 март куни “Сельта”га қарши сафар ўйинини ўтказиб юборади. Франко Мастантуоно шунингдек, 14 март куни “Элче”га қарши ўйинда ҳам майдонга туша олмайди.

Маълумот учун, Ла Лига жорий мавсумида Мастантуоно 16 та ўйинда майдонга тушиб, 1 та гол урган.