“Реал” кетма-кет 2-йил “Олтин тўп” маросимига бормайди

Испаниянинг “Реал Мадрид” жамоаси 22 сентябрь куни Париждаги “Teatre du Chatelet”да ўтказиладиган “Олтин тўп” топшириш маросимида яна иштирок этмаслиги кутилмоқда. Бу ҳақда “Lequipe” нашри хабар берди.

Клуб ўтган йил ҳам тантанани бойкот қилган эди.

2024 йилдаги маросим “Реал Мадрид” ва мукофот ташкилотчилари “France Football” ҳамда UEFA ўртасидаги муносабатларнинг кескин совуқлашганини кўрсатганди. Мадридликлар “Олтин тўп”ни топшириш жараёнида ҳақиқат бузилганини ва дунёнинг энг яхши футболчисини аниқлашда адолатга риоя қилинмаганини таъкидлаб келади.

Ўша йили тадбирдан “Реал Мадрид” бутун делегацияси, жумладан, мураббий Карло Анчелотти, Карвахал, Беллингем, Валверде ва маросимда дунёнинг энг яхши футболчиси сифатида тақдирланишини кутган Винисиус ҳам сафардан воз кечганди. Бу қарор Париждаги гала кечасини ҳайратда қолдириб, бутун футбол оламида катта резонанс келтириб чиқарганди.

Сўнгги ойлар ичида “France Football” “Реал Мадрид” билан алоқаларни тиклашга уринди. Ҳатто делегация Мадридга ташриф буюрди, бироқ учрашувлар натижасиз якунланди. Клуб, айниқса, ўтган мавсумда мезонларнинг ўзгартирилиши ва айрим баҳолашдаги ноаниқликларни тушуниб бўлмаслигини билдирди. UEFA'нинг маросимга қўшилиши ҳам “Реал Мадрид” билан муносабатларни янада мураккаблаштирди.

7 август куни “France Football” эълон қилган 30 нафар номзод қаторига “Реал Мадрид”нинг уч нафар футболчиси (Килиан Мбаппе, Жуд Беллингем ва Винисиус Жуниор) киритилган. Бошқа тоифаларда эса Тибо Куртуа энг яхши дарвозабон (Лев Яшин) совринига номзод бўлди. Аёллар ўртасидаги “Олтин тўп”га даъвогарлар орасида Каролин Уэйр ҳам бор. Дин Хёйсен эркаклар ўртасидаги “Копа” кубоги учун, Линда Кайседо эса аёллар ўртасидаги “Копа” кубоги учун курашмоқда.  
   
Маълумот учун, 1956 йилдаги биринчи марта “Олтин топ” соврини таъсис этилгандан  буён 9 маротаба “Реал Мадрид” футболчилари ушбу совринга эга чиққан.