Расман! Винисиус “Эль-Класико”ни ўтказиб юборадиган бўлди

Мадриднинг “Реал” клуби ҳужумчиси Винисиус Жуниор Испания чемпионатининг 8-турида “Вильярреал”га қарши учрашувда (1:0) қизил карточка олгани учун “Барселона”га қарши бўлиб ўтадиган “Эль-Класико”ни ўтказиб юборади. Бу ҳақда Испания қироллик футбол федерацияси (RFEF) интизом қўмитаси матбуот хизмати хабар берди.

Бразилиялик футболчи “Вильярреал” ярим ҳимоячиси Нейтан Салибани сочидан ушлаб олгани учун майдондан четлатилганди. Футболчининг ушбу иши учун федерация 4 та ўйинлик дисквалификацияни эълон қилди.

Шу тариқа, Винисиус “Севилья” (18 октябрь), “Барселона” (25 октябрь), “Расинг” (1 ноябрь) ва “Валенсия” (7 ноябрь) жамоаларига қарши учрашувларни ўтказиб юборади.

Испания чемпионатининг саккиз туридан сўнг “Реал” 18 очко билан 4-ўринда бормоқда. “Барселона” 24 очко билан пешқадамлик қилмоқда. “Атлетико Мадрид” ва “Бетис” эса 19 очкодан жамғарган ҳолда иккинчи ва учинчи ўринларни эгаллаб турибди.

“Барселона” ва “Реал Мадрид” иштирокидаги “Эль-Класико” учрашуви жорий йилнинг 25 октябрь куни Каталониядаги “Камп Ноу” стадионида бўлиб ўтади.

Маълумот учун, 26 ёшли Винисиус жорий мавсумда “Реал” сафида барча мусобақаларда тўққизта учрашувда майдонга тушиб, бир гол ва учта голли узатма муаллифи бўлган.